دانانی كانیۆلا و دەرزیلێدان لە دەرمانخانەكان قەدەغە دەکرێت

ئاڤا نیوز 

وەزارەتی تەندروستی بە نووسراوی فەرمی جەخت لە قەدەغەكردنی دانانی كانیۆلا و دەرزیلێدان لە دەرمانخانەكان دەكاتەوە، ڕاشیدەگەیێنێت نابێت بێ ڕەچەتەی پزیشك دەرمان بە نەخۆش بدرێت.

وێنە گەورەكە: لە زۆرینەی گەڕەكەكان لە شار و شارۆچكەكانی هەرێمی كوردستان، نۆرینگەی تەندروستی و دەرمانخانە هەن، زۆرینەی دەرمانخانەكان كاری نۆرینگەكانیش دەكەن، كانیۆلا بۆ نەخۆش دادەنێن و دەرزیش لە نەخۆش دەدەن، وەزارەتی تەندروستی ئەمە قەدەغە دەكات.

نووسراوی فەرمی: وەزارەتی تەندروستی نووسراوی فەرمی ئاراستەی سەرجەم لقەكانی سەندیكای دەرمانسازان كردووە، لقەكانی سەندیكاش نووسراوەكەیان بۆ سەرجەم دەرمانخانەكان ناردووە و هەر دەرمانخانەیەك پابەند نەبێت دادەخرێت.

لێدوانی تایبەت: د. ڕەنج محەممەد، سەرۆكی لقی هەولێری سەندیكای دەرمانسازانی كوردستان بە ئاڤا نیوزی ڕاگەیاند: نابێت لە هیچ دەرمانخانەیەك كانیۆلا دابنرێت و دەرزی لە نەخۆش بدرێت، هەر دەرمانخانەیەك سەرپێچی بكات سەرەتا سێ ڕۆژ دادەخرێت، ئەگەر دووبارەبكرێتەوە هەفتەیەك دادەخرێت، ئەگەر لە سێجار زیاتر سەرپێچی بكات ئەوا دەرمانخانەكە بەیەكجاری دادەخرێت.