عێراق هەزاران کرێکاری بیانی ڕەوانەی وڵاتەکانیان دەکاتەوە

ئاڤا نیوز

 

حکومەتی عێراق هەڵمەتێک بۆ دۆزینەوە و ئاشکراکردنی ئەو کرێکارە بیانییانە دەستپێدەکات کە بەشێوەیەکی نایاسایی لە وڵاتەکەدان، ئەویش بە ئامانجی ڕەوانەکردنەوەیان بۆ وڵاتانی خۆیان.

 

وێنە گەورەکە: بەگوێرەی ئامارە فەرمییەکان لە عێراق 43 هەزار کرێکاری بیانی هەن کە مۆڵەتی کارکردنیان هەیە، لەو ژمارەیەش بەشێکی زۆریان مۆڵەتی ساڵانەیان نوێ نەکردووەتەوە و ئێستاش لە وڵاتەکەدا کاردەکەن.

 

لێدوانی فەرمی: نەجم عەقابی، گوتەبێژی وەزارەتی کار و کاروباری کۆمەڵایەتیی عێراق ڕایگەیاند: وەزارەتەکەمان بە هاوکاری وەزارەتی ناوخۆ دەیەوێت سنوورێک بۆ هاتنی کرێکاری بیانی بەشێوەی نایاسایی دابنێت.

 

لەلایەکی دیکەوە: لە قۆناغی داهاتوودا هەڵمەتێکی گەڕان و پشکنین لە هەموو پارێزگاکان دەستپێدەکات و ئەو کرێکارانەی بە نایاسایی هاتوونەتە عێراق یان ماونەتەوە، ڕەوانەی وڵاتەکەنیان دەکرێنەوە.