هەڵبژاردنی سەرۆكی ئەنجوومەنی نوێنەران تاوەكو سەرەتای مانگی داهاتوو دوادەكەوێت

ئاڤا نیوز

چوار مانگە هەڵبژاردنی سەرۆکێکی نوێ بۆ ئەنجوومەنی نوێنەرانی عێراق یەکلایی نەبووەتەوە، لایەنەکان هیچ ڕێککەوتنێکیان لەسەر دانانی کەسێک بۆ ئەم پۆستە نەکردووە، پێدەچێت دوای دانیشتنی دادگای فیدراڵيی ئەم پرسە یەکلایی ببێتەوە.

وێنە گەورەکە: ڕۆژی 28-02-2024، دادگای فیدراڵيی دادبینی بۆ دوو سکاڵای پەیوەست بە هەڵبژاردنی سەرۆکی ئەنجوومەنی نوێنەران دەکات، کە داواکراوە کاندیدبوونی شەعلان کرەیم، بەربژێری هاوپەیمانی تەقەدووم هەڵبوەشێنێتەوە تاوەکو سەرۆکێکی نوێ هەڵدەبژێردرێت.

لێدوانی فەرمی: پرسی یەکلاییبوونەوەی هەڵبژاردنی سەرۆکێکی نوێ بۆ ئەنجوومەنی نوێنەرانی عێراق، پەیوەستە بە دانیشتنی دادگای فیدراڵی کە کۆتایی ئەم مانگە دەکرێت و کەیسی کاندیدبوونی شەعلان کرەیم یەکلایی دەبێتەوە. شوان محەممەد، ئەندامی ئەنجوومەنی نوێنەرانی عێراق وای بە ئاڤا نیوز گوت.

باکگراوند: ڕۆژی 14-11-2023، دادگای باڵای فیدراڵیی عێراق لەسەر سکاڵایەکی لەیس دلێمی، ئەندامێتیی محەممەد حەلبووسی سەرۆکی ئەنجوومەنی نوێنەرانی عێراقی هەڵوەشاندەوە، لەوکاتەوە موحسین مەندەلاوی جێگری یەکەمی سەرۆکی ئەنجوومەن سەرپەرشتیی دانیشتنەکان دەکات، بەگوێرەی بڕیاری دادگای فیدراڵی دەتوانێت دەسەڵاتی سەرۆک بەکار بهێنێت و پڕۆژەیاساکان تێپەڕێنێت.