هەفتەی داهاتوو گەڕێکی دیکەی دانوستاندن لەنێوان دوو بەرە ناکۆکەکەی نەینەوا بەڕێوەدەچێت

ئاڤا نیوز 

 

لایەنەکانی نەینەوای موستەقبەل داوەتێکی بۆ لایەنەکانی نەینەوا لیئەهلیها ڕێکخستووە، بەمەبەستی هێورکردنەوەی دۆخی نێوانیان و دەستپێکردنەوەی کۆبوونەوەکانی ئەنجوومەنی پارێزگای نەینەوا، بەڵام ئەندامانی پارتی لەو داوەتە بەشدار نەبوون.

 

وێنە گەورەکە: نزیکەی 70 ڕۆژە کۆبوونەوەی ئەنجوومەنی پارێزگای نەینەوا بەهۆی بایکۆتی ئەندامانی نەینەوا لیئەهلیها نەکراوە، هەردوو بەرەکە لەسەر چەند خاڵێک کۆکن و بڕیارە هەفتەی داهاتوو بۆ لێکنزیکبوونەوەیان بەرەی نەینەوای موستەقبەل دانیشتنێک ڕێکبخات.

 

ئەوەی پێویستە بیزانیت: ئەنجوومەنی پارێزگای نەینەوا لە 29 کورسی پێکدێت، لایەنەکانی نەینەوای موستەقبەل لە 16 ئەندام و نەینەوا لیئەهلیها 13 ئەندامیان هەیە، ڕۆژی 28-07-2024 ئەنجوومەنی پارێزگای نەینەوا بەبێ ئامادەبوونی نەینەوا لیئەهلیها کۆبووەنەوە و پۆستەکانیان لەنێوان خۆیاندا دابەش کرد، بەڵام بڕیاری دابەشکردنی پۆستەکان ڕاگیراوە و چاوەڕوان دەکرێت دادگەی کارگێڕیی بەغدا پرسەکە یەکلایی بکاتەوە.

 

لێدوانی فەرمی: محەممەد جاسم، ئەندامی فڕاکسیۆنی یەکێتی لە ئەنجوومەنی پارێزگای نەینەوا بە ئاڤا نیوزی گوت، "دوای کۆبوونەوەی نێوانمان لەسەر ئەوە ڕێککەوتین هەفتەی داهاتوو دانیشتنی دیکە بکەین و لەسەر بنەمایەکی نوێ ڕێککەوین".

 

زانیاریی زیاتر: دوورخستنەوەی جێگری سەرۆکی ئەنجوومەنی پارێزگا یەکێکە لە مەرجە سەرەکییەکانی لایەنەکانی نێو نەینەوا لیئەهلیها، بەگوتەی محەممەد جاسم ئەو مەرجە ڕەتکراوەتەوە، هەروەها ڕازین لەسەر دابەشکردنی پۆستەکان کە لەسەر بنەمای هەڵبژاردن بێت، هەڵبژاردنی سەرۆک، جێگر و ئەندامی ئەو پێنج لیژنەیەی ئەنجوومەن کە بەرکەوتەی بەرەی نەینەوا لیئەهلیهان.

 

بۆچوونی لایەنی بەرامبەر: ئەحمەد کیکی، ئەندامی فڕاکسیۆنی پارتی لە ئەنجوومەنی پارێزگای نەینەوا بە ئاڤا نیوزی ڕاگەیاند، "لە کۆی 13 کەس تەنیا پێنج ئەندامی بەرەی ئێمە لەو داوەتە بەشداربوون و چوار ئەندامەکەی پارتی هیچیان لەوێ نەبوون، بەڵام هەوڵی لێکنزیکبوونەوە بۆ کۆبووەنە لە نێوان هەردوو بەرەکە لە ئارادایە". 

 

باکگراوند: ڕۆژی 05-02-2024 لە یەکەم دانیشتنی ئەنجوومەنی نوێی پارێزگای نەینەوا، عەبدولقادر دەخیل، بە زۆرینەی دەنگ بە پارێزگاری نەینەوا هەڵبژێردرا. د. ئەحمەد حاسوود، سەرۆکی ئەنجوومەنی پارێزگای نەینەوا و محەممەد جبووری، بە جێگری سەرۆکی ئەنجوومەنی پارێزگای نەینەوا هەڵبژێردران، پۆستی جێگری پارێزگار بەر سیروان ڕۆژبەیانی لە پشکی پارتی کەوتووە.