دوای هێرشەکانی لوبنان سەدر لە خۆپیشاندنی ملیۆنی پاشگەز دەبێتەوە

ئاڤا نیوز

 

ڕێبەری ڕەوتی نیشتیمانی شیعە لە ڕێکخستنی خۆپێشاندانی ملیۆنی پاشگەزدەبێتەوە و پێیوایە دوای بەردەوامیی "دەستدرێژییەکانی ئیسرائیل بۆسەر لوبنان و فەڵەستین" ئەو خۆپیشاندانە سوودی نابێت.

 

وێنە گەورەکە: بڕیاربوو هەینی داهاتوو 20ی ئەیلوول لەسەر داوای موقتەدا سەدر، خۆپێشاندانی ملیۆنی لە گۆڕەپانی تەحریری بەغدای پایتەخت بەڕێوەبچێت و داوای لە لایەنگرانی کردبوو کفن لەبەر بکەن، بۆ ئەوەی دەنگ و وێنەیان بگاتە هەموو جیهان وەک دەرخستنی هاوسۆزی گەلی عێراق بۆ دۆزی فەڵەستین.

 

ڕاگەیێنراوی فەرمی: ئێوارەی ڕۆژی 18-9-2024، موقتەدا سەدر، ڕێبەری ڕەوتی نیشتیمانی شیعە لە ڕاگەیێنراوێکدا ڕایگەیاند: "دوای بێباکی و تیرۆری زایۆنیستەکان لە فەڵەستین و لوبنان و بە بەرگی ئاشکرای ئەمریکا و وەڵامنەدانەوەیان بە بڕیارنامە نێودەوڵەتییەکان و بانگەوازە مرۆییەکان کە دەیانەوێت هەموو ناوچەکە بکێشێتە ناو شەڕی قڕکردنەوە. بە لۆژیکی دەزانم خۆپیشاندانەکان هەڵبووەشێنمەوە، پێموایە دوای ئەم هەموو دەستدرێژییانەی زایۆنیستەکان سوودی نییە". سەدر  دەشڵێ "خۆپێشاندانەکان ناگەنە ئاستی ئەو ڕووداوە گەورانەی ڕوودەدەن".

باکگراوند: هەڵوەشاندنەوەی خۆپێشاندانەکە لەکاتێکدایە ڕۆژی سێشەممە 17-9-2024 ئیسرائیل هێرشێکی ئەلیکترۆنی کردە سەر بێتەلەکانی ئەندامانی حیزبوڵڵای لوبنان لە جۆری پەیجەر و بەهۆیەوە، 12 کەس کوژران و نزیکەی سێ هەزار کەسیش بریندار بوون، ئەمڕۆ چوارشەممەش جارێکی دیکە هێرشی ئەلیکترۆنی کردە سەر بێتەلەکانی ئەندامانی حیزبوڵڵا لە ئایکۆم 82، بەهۆیەوە 14 کەس کوژران و زیاتر لە 450 کەسیش بریندار بوون.