حەماس جارێكی دیكە داوای ئاگربەست دەكات

ئاڤا نیوز

 ئیسماعیل هەنییەی سەرۆكی مەكتەبی سیاسیی حەماس داواكارییەكانی بزووتنەوەكەی دووپات كردەوە، كە یەكێك لەوانە ئاگربەستی تەواوی شەڕی غەززەیە. دوێنێش بایدن بۆ ئاڵوگۆڕكردنی بارمتە و گیراوەكان داوای ئاگربەستی كاتیی كرد.

ڕاگەیێنراوی فەرمیی: ئیسماعیل هەنییە، سەرۆكی مەكتەبی سیاسیی حەماس ، ئەمڕۆ بەیاننامەیەكی بڵاو كردەوە و چەند داواكارییەكی بزووتنەوەكەی دووپات كردەوە. 

ئیسماعیل هەنییە گوتی: "خەباتمان بە هیچ شتێكی كەمتر لەمانە ڕازی نابێت، ئاگربەست و كشانەوەی تەواو لە كەرتی غەززە و لابردنی گەمارۆی سەركوتكەرانە و دابینكردنی پەناگای پارێزراو بۆ ئاوارەكان".

ئەوەی پێویستە بیزانیت: هەفتەی ڕابردوو لە قاهیرە دانوستان لە ئاستی باڵادا كرا بۆ ڕاگرتنی شەڕی حەماس ئیسرائیل.

لە لایەكی دیكەوە: دوێنێ بایدن داوای ئاگربەستێكی كاتیی كرد بۆ ئازادكردنی بارمتەكانی لای حەماس، لە بەرامبەریشدا ئازادكردنی هەندێك گیراوی حەماس لای ئیسرائیل، ئاماژەی بەوەش دا كە لەم بارەیەوە لەگەڵ ناتانیاهۆدا گفتوگۆی گەرمی كردووە. ئەوەش لەكاتێكدایە بنیامین نەتانیاهۆ سەرۆكوەزیرانی ئیسرائیل پێشنیازی ئاگربەستەكەی پێشووی حەماسی ڕەت كردەوە.