لیستی مووچەی مانگی نۆ ڕەوانەی بەغدا دەکرێت

ئاڤا نیوز

 

وەزارەتی دارایی و ئابووریی هەرێمی کوردستان سەرقاڵی ئامادەکردنی لیستی مووچەی مانگی نۆیە بەو شێوازەی کە بەغدا داوای کردووە، بڕیارە لە دوو ڕۆژی داهاتوودا لیستەکە ئامادە بکرێت و ڕەوانەی بەغدا بکرێت. 

وێنە گەورەکە: بڕی 755 ملیار دینار لەلایەن بەغداوە بۆ مووچەی مانگی هەشت نێردراوە، هەرچەندە 243 ملیار کورتهێنان هەیە بەڵام وەزارەتی دارایی بەنیازە تاوەکو سبەی ئێوارە لیستی دابەشکردنی مووچە بڵاوبکاتەوە، ئەم هەفتەیەش مووچەی مانگی  نۆ بۆ بەغدا دەنێردرێت و بڕیارە دوو هەفتە دوای گەیشتنی لیست خەرج بکرێت.

 

لێدوانی فەرمی: هونەر جەمال، گوتەبێژی وەزارەتی دارایی و ئابووریی هەرێمی کوردستان بە ئاڤا نیوزی ڕایگەیاند: تیمەکانمان بەردەوام کار دەکەن تاوەکو لیستی مووچە مانگی نۆ بەم شێوازە ئامادە بکرێت کە داواکاریی بەغدایە، هاوکات لە دوو ڕۆژی داهاتوو دا لیستەکە ڕەوانەی بەغدا دەکرێت.

 

هەر بە گوتەی گوتەبێژی وەزارەتی دارایی، چوار ڕۆژە تیمەکانی وەزارەتی دارایی بۆ ئامادەکردنی لیستی مووچەی مانگی نۆ کار دەکەن. ئاماژەی بۆ ئەوەش کرد گرفتەکانی بەردەم مووچە لە ڕابردوودا زیاتر سیاسی بوون نەوەک هونەری.

 

باکگراوند: لە ماوەی دوو مانگی ڕابردوودا  بەغدا بەردەوام بەبیانووی جیاواز هەوڵدەدات کێشە بۆ ناردنی مووچەی مووچەخۆرانی هەرێمی کوردستان دروست بکات، بەڵام دوای کۆبوونەوە ئابوورییەکان لە هەولێر بەسەرپەرشتی سەرۆکوەزیران بارزانی، ناردنی مووچە لەلایەن بەغدا گەرەنتی کراوە.

 

ئەمەش بزانە: پێشتر د.ئومێد سەباح، سەرۆکی دیوانی ئەنجوومەنی هەرێمی کوردستان بە ئاڤا نیوزی گوتبوو، دوای ناردنی مووچەی مانگی هەشت، دوو هەفتە دواتر مووچەی مانگی نۆ لەلایەن بەغدا دەنێردریت.