دانیشتنی دادگەی فیدراڵی لەبارەی هەڵبژاردنی پەرلەمانی کوردستان دواخرا

ئاڤا نیوز

 

 لە كاتێكدا چاوەڕوان دەكرا، دادگەی فیدراڵی عێراق پرسی یاسای هەڵبژاردنی پەرلەمانی كوردستان یەكلایی بكاتەوە، بەڵام دوایخست بۆ ڕۆژی چوارشەممە 21-02-2024.

وێنە گەورەكە: سكاڵاكە لەلایەن زیاد جەبار، سەرۆكی فراكسیۆنی یەكێتیی نیشتیمانیی لە پەرلەمانی كوردستان و ئامانج نەجیب شەمعوون، ئەندامی خولی پێشووی ئەنجومەنی پارێزگای سلێمانی تۆمار كراوە، تایبەتە بە هەڵوەشانەوەی ماددەكانی (1، 9، 15، 22 و 36) لە یاسای هەڵبژاردنی هەرێمی كوردستان.

ئەوەی ئێستا ڕوودەدات: جاری یازدەهەمە دانیشتنی دادگەی فیدڕاڵیی عێراق تایبەت بە یاسای هەڵبژاردنی هەرێمی كوردستان دوادەخرێت، ئەمەش كاریگەری نەرێنیی لەسەر یەكلایی كردنەوەی وادەیەك بۆ هەڵبژاردنی خولی شەشەمی پەرلەمانی كوردستان  دەكات.

باكگراوند: تا ئێستا سێ جار وادەی بەڕێوەچوونی هەڵبژاردنی خولی شەشەمی پەرلەمانی كوردستان گۆڕاوە، دوایین وادە 25-02-2024 بوو،  بەڵام كۆمیسیۆنی باڵای سەربەخۆی هەڵبژاردنەكانی عێراق بە نووسراوی فەرمی ئاماژەی بەوەدا كە ناتوانن لەو ڕێككەوتە سەرپەرشتی هەڵبژاردن بكەن. ڕۆژی سێشەممە 16-01-2024، وەفدێكی باڵای كۆمیسیۆنی باڵای سەربەخۆی هەڵبژاردنەكانی عێراق، لەگەڵ سەرۆكایەتیی هەرێمی كوردستان لە هەولێر كۆبووەوە بۆ دیاریكردنی وادەیەكی نوێ، بەڵام لەسەر هیچ بەروارێك ڕێكنەكەوتن.