عێراق 21 کەس بە تۆمەتی تیرۆر لە سێدارە دەدات

ئاڤا نیوز 

 

سزای لەسێدارەدان بەسەر 21 کەس بە "تاوانی تیرۆر" لە زیندانی حووت لە پارێزگای ناسرییە جێبەجێ دەکرێت، یەکێک لە سزادراوەکانیش کچێکە.

 

وێنە گەورەکە: سەرەڕای هۆشدارییەکانی ڕێکخراوی لێبووردنی نێودەوڵەتی لەبارەی "بە هەڕەمەکی لەسێدارەدان لە عێراق" و "نەبوونی دادپەروەری"، پڕۆسەی لەسێدارەدان لەناو زیندانەکانی عێراق بەردەوامە.

 

زانیاریی بەدەستهاتوو: سەرچاوەیەکی ئەمنیی لە پارێزگای زیقار بە ئاڤا نیوزی ڕاگەیاند: زۆرینەی ئەو سزادراوانەی لەسێدارە دراون "پەیوەندییان بە داعشەوە هەیە". بێ ئەوەی ڕەگەزنامەی سزادراوەکان ئاشکرا بکات کە ئایا عێراقین یان بیانین.

 

ئەوەی پێویستە بیزانیت: ژمارەی ئەو کەسانەی بە تۆمەتی تیرۆر لە زیندانەکانی عێراقدان، نزیکەی 20 هەزار زیندانیکراو دەبێت. هاوکات هێزە سیاسییەکان بەهۆی "گومان لە لێکۆڵینەوەکان"، هەوڵی ئەوە دەدەن بەشێک لە تۆمەتباران "دادگایی بکرێنەوە".