لەسەر دۆسیەی "سیخوڕی" سکاڵا لەسەر برایەکی سەرۆکوەزیرانی عێراق تۆمار دەکرێت

ئاڤا نیوز

 

بە تۆمەتی "سیخوڕی" سکاڵای یاسایی لەدژی چوار کەسایەتی نزیک لە سەرۆکوەزیرانی عێراق تۆمار دەکرێت، یەکێک لەوانە برای محەممەد شیاع سوودانییە.

 

وێنە گەورەکە: لە 19ی مانگی ئابی ڕابردوو پەردە لەسەر تۆڕێکی سیخوڕی لە کۆشکی حکومی لە نووسینگەی سەرۆکوەزیران هەڵدرایەوە، کاری تۆڕەکە گوێگرتن و سیخوڕی بووە بەسەر مۆبایلی پەرلەمانتاران و ناوزڕاندنیان.

 

لێدوانی فەرمی: پەرلەمانتار مستەفا سەنەد ڕایگەیاند: لە دادگای کەرخی یەک، سکاڵای یاسایی لەسەر هەریەک لە حەیدەر لەیس سوودانی، بەڕێوەبەری بەڕێوەبەرایەتی (انصات) لە هەواڵگری عێراق و حەیدەر شیاع سوودانی، برای سەرۆکوەزیرانی عێراق و عەبدولکەریم سوودانی، سکرتێری سەربازیی سەرۆکوەزیرانی عێراق و کەسایەتیەکی دیکەش تۆمارکردوە.

 

زانیاریی زیاتر: بە گوتەی سەنەند: کۆمپانیای زەین بۆی پشتڕاستکردوەتەوە لە ساڵی 2023 و 2024 مانگەکانی شەش و حەوت سیخوڕی بەسەر تەلەفۆنەکەیەوە کراوە بەبێ بوونی فەرمانی دادوەر، بۆیە لەژێر ڕۆشنایی ئەو بەڵگانەدا سکاڵای یاسایی تۆمارکردووە".