وەزارەتی دارایی عێراق: یاسای خانەنشینی وەک خۆی لە هەرێم جێبەجێ دەکرێت

ئاڤا نیوز

 

 وەزارەتی دارایی عێراق لەبارەی هاوتاکردنی مووچەی خانەنشینان و تەمەنی خانەنشینی ڕاگەیێنراوێک بڵاودەکاتەوە و ڕایدەگەیێنێ، یاسای خانەنشینی وەک خۆی لە هەرێمی کوردستان جێبەجێ دەکرێت.

وێنە گەورەکە: لە مووچەی مانگی حەوتەوە یاسای ژمارەی 9ی خانەنشینی عێراق چووەتە بواری جێبەجێکردنەوە و زۆربەی خانەنشینانی مەدەنی بەم یاسایە مووچە وەردەگرن، بەڵام خانەنشینانی سەربازی هێشتا مووچەیان هاوتا نەکراوە، هاوکات کۆمەڵێک بڕگە و خاڵی دیکە هەن دەبێت سەرجەمیان لەنێوان هەولێر و بەغدا هاوتا بکرێن.

ڕاگه‌یێنراوی فه‌رمی: بەشی ڕاگەیاندن و پەیوەندی حکومی لە وەزارەتی دارایی عێراق بڵاوی کردەوە، ئەمڕۆ کۆبوونەوەی دووەم لە نێوان فەرمانگەی یاسایی وەزارەتی دارایی عێراق و شاندی هەرێمی کوردستان کراوە، سەبارەت بە ئەگەری جێبەجێکردنی بڕگەکانی یاسای خانەنشینی یەکگرتوو بۆ خانەنشینانی هەرێمی کوردستان.

زانیاریی زیاتر: وەزارەتی دارایی عێراق ڕوونیکردووەتەوە، کۆبوونەوەکان بەردەوام دەبن بۆ جێبەجێکردنی یاسایی یەکگرتووی گشتی و جێبەجێکردنی یاسایی ژمارە نۆی ساڵی 2014 بەمەبەستی ڕێکخستنەوەی دەرماڵەی خانەنشینانی هەرێمی کوردستان لەگەڵ تەمەنیان کە لە هەرێم 63 ساڵە و لە عێراق 60 ساڵە.