دهۆک سەوز دەکرێت

ئاڤا نیوز

لە سەنتەری شاری دهۆک هەشت پارک هەیە و چوار پارکیش لە قۆناغی جێبەجێکردندان، بڕیارە ئەمساڵ دوویان تەواو بکرێن، بەمەش ڕێژەی سەوزایی ستانداری جیهانی تێدەپەڕێنێت.

وێنە گەورەکە: ئێستا لە پارێزگای دهۆک ڕێژەی سەوزایی 14٪یە، بەپێی ستانداردی جیهانی پێویستە 15% کەمتر نەبێت، بە تەواوبوونی چوار پارکەکە ڕێژەی سەوزایی دەگاتە 20%.

چیرۆکی سەرەکی: سەرەتای مانگی شەشی ئەمساڵ سەرۆکوەزیران مەسرور بارزانی بەردی بناغەی دوو پارکی گەورەی بە ناوەکانی (ئاڵووکا و سەرهەڵدان) لەسەر ڕووبەری 700 دۆنم زەوی بە گوژمەی 135 ملیار دینار لە سەنتەری شاری دهۆک دانا.

لێدوانی فەرمی: ئیسماعیل مستەفا، بەرپرسی ڕاگەیاندنی شارەوانی دهۆک بە ئاڤا نیوزی ڕاگەیاند: "زیادکردنی ڕێژەی سەوزایی و گرینگیدان بە ژینگە یەکێكە لە ئامانجەکانی حکومەت، ئێستا ڕێژەی سەوزایی لە دهۆک 14% یە و بە تەواوبوونی پارکەکان ڕێژەی سەوزایی دەبێتە 20٪، بەمەش دهۆک زیاتر سەوز دەبێت".

ژمارەکان وادەڵێن: ژمارەی پارکە گەورەکان لە دهۆک دەبێتە 12، لە گەڕەکەکان 148 باخچە هەیە و بە کۆی گشتیش دهۆک خاوەنی زیاتر لە 45  هەزار دارە.

 

لەلایەکی دیکەوە: کاروان ساڵح، بەڕێوەبەری ئەندازەی پارکەکانی دهۆک بە ئاڤا نیوزی گوت: هەزاران دار لە پارکەکانی (ئاڵووکا و سەرهەڵدان) دەچێنرێن، بەمەش گۆڕانکارییەکی گەورە لە ڕێژەی سەوزایی دهۆک دەکرێت.