400 ملیۆن دۆلار بۆ ناوچە ئازادکراوەکانی عێراق و سووریا تەرخان دەکرێت

ئاڤا نیوز

 

هاوپەیمانیی نێودەوڵەتی دژی داعش بە سەرۆکایەتیی ئەمریکا، نزیکەی 400 ملیۆن دۆلار بۆ پاڵپشتی ناوچە ئازادکراوەکانی دەستی داعش لە عێراق و سووریا تەرخان دەکات و پاڵپشتی خۆشی بۆ عێراق لە ڕووبەڕووبوونەوەی داعش دووپات دەکاتەوە.

 

چیرۆکی سەرەکی: دەیەمین کۆبوونەوەی وەزاریی هاوپەیمانیی نێودەوڵەتی دژ بە داعش بە بەشداری وەزیران و بەرپرسانی باڵای 87 وڵات لە نێویاندا فوئاد حوسێن، جێگری سەرۆکوەزیران و وەزیری دەرەوەی عێراق لە واشنتن بەڕێوەچوو.

 

ڕاگەیێنراوی فەرمی: هاوپەیمانیی نێودەوڵەتی دژی داعش ڕایگەیاند: هاوپەیمانیێتیەکە پابەندی خۆی بە پاڵپشتیکردنی هەوڵەکانی حکومەتی عێراق بۆ پاراستنی ئاسایش و ئارامی و گەشەپێدانی گەلەکەی دووپات کردەوە، هاوکات پلانی گۆڕینی ئەرکی هاوپەیمانیێتیەکە بۆ هاوبەشی ئەمنی دوو لایەنە کاریەگەریی لەسەر  کەمبوونەوەی مەترسییەکانی داعش هەبووە.

 

زانیاریی زیاتر:  "وەزیرەکان پشتگیری لە کاری لە پێشینەی گرووپی کاری هاوپەیمانان دەکەن بە ئامانجی کۆکردنەوە و بەکارهێنانی 394 ملیۆن دۆلار بۆ ئەو ناوچانەی لە عێراق و سوریا لە دەست داعش ئازادکراون". هاوپەیمانی نێودەوڵەتیی دژی داعش وای گوت.

 

ئەوەی پێویستە بیزانیت: هاوپەیمانیی نێودەوڵەتی بۆ تێکشکاندنی داعش گەورەترین هاوپەیمانیی نێودەوڵەتییە لە مێژوودا لە ساڵی 2014 بە سەرکردایەتی ئەمریکا پێکهێنرا و لەمساڵدا ژمارەی وڵاتە بەشداربووەکان دوای پەیوەندیکردنی ماڵدیڤ گەیشتە 87 وڵات، هاوپەیمانیێتیەکە پابەندە بە تێکشکاندنی ئەو ڕێکخراوە لە هەر شوێنێک چالاکی بکات.