لە شارەبان داعش پلەدارێک و چەکدارێکی حەشدی شەعبی دەکوژێت

ئاڤا نیوز

 

 لە قەزای شارەبانی سەر بە پارێزگای دیالە، چەکدارانی داعش هێرش دەکەنە سەر ئۆتۆمبێلێکی حەشدی شەعبی، پلەدارێک و چەکدارێکی حەشد دەکوژن.

چیرۆکی سەرەکی: ئێوارەی ئەمڕۆ شەممە ئۆتۆمبێلێک کە دوو چەکداری حەشدی شەعبی تێدا بووە، لە نزیک بێستانی ڕەشید ئەتعان کە دەکەوێتە بەشی باکووری قەزای شارەبان (میقدادیە)ی سەر بە پارێزگای دیالە، لەلایەن چەکدارانی داعش هێرشی کراوەتە سەر و هەردوو چەکدارەکەی حەشدی شەعبی کوژراون.

زانیاریی بەدەستهاتوو: یەکێک لە چەکدارە کوژراوەکان بە ناوی وسام مووسەوی، پلەدار بووە و جێگری ئامر فەوجی دووی حەشدی شەعبی بووە لە پارێزگای دیالە، چەکدارە کوژراوەکەی دیکە ناوی عەبدوڵڵا جبوورییە.

لێدوانی فەرمی: ئەوس ئیبراهیم، ئەندامی ئەنجوومەنی پارێزگای دیالە هەواڵەکەی بۆ ئاڤا نیوز پشتڕاستکردەوە گوتی: دوو چەکداری حەشد کوژراون، بەڵام زانیاریم نییە پلەدارن یان نا.

 

باکگراوند: هەر ئەمڕۆ لە سنووری پارێزگای نەینەوا لە نێوان سوپای عێراق و چەکدارانی داعش پێکدان ڕووی دا و لەنێو تونێلێکدا چەکدارێکی داعش کوژرا.