مامۆستایانی ناڕازی بایکۆت دەشکێنن

ئاڤا نیوز

 

ئەنجوومەنی سەرتاسەریی مامۆستایانی ناڕازی ڕاگەیێنراوێکیان لەبارەی بایکۆت بڵاوکردووە و بڕیاریان دا، لە سنووری پارێزگاکانی سلێمانی و هەڵەبجە، هەردوو ئیدارەی سەربەخۆی گەرمیان و ڕاپەڕین بایکۆت بشکێنن.

 

وێنە گەورەکە: زیاتر لە چوار مانگە لە پارێزگاکانی هەولێر و دهۆک خوێندن دەستیپێکردووەتەوە، بەڵام مامۆستایانی سنووری سلێمانی و دەوروبەری بەهۆی دواکەوتنی مووچە، بایکۆتیان ڕاگەیاندووە، ئەمەش بەەهۆی نەناردنی شایستە داراییەکانی هەرێمی کوردستان لەلایەن حکومەتی عێراق.

 

ڕاگەیێنراوی فەرمی: پاش کۆبوونەوەی بەشێک لە نوێنەرانی مامۆستایانی ناڕازیی لەگەڵ جێگری سەرۆکوەزیرانی هەرێمی کوردستان کە بڕیاری حکومەتی هەرێمی کوردستانی بۆ دووپاتکردنەوە، بڕیاردرا پاش هەموارکردنەوەی یاسای بودجەی عێراق، "پلەبەرزکردنەوەی مامۆستایان بخرێتە بواری جێبەجێکردن و مامۆستایانی وانەبێژ بەشێوەی گرێبەست دابمەزرێنرێن".

 

زانیاریی زیاتر: دوای ئەو بڕیارانەی لە کۆبوونەوەکە دران، مامۆستایانی ناڕازی بڕیاریاندا بۆ نەفەوتانی ساڵێکی خوێندن بایکۆت لە ناوەندەکانی خوێندن بشکێنن و لە ئەگەری جێبەجێنەکردنیان، دەست بە بایکۆت دەکەنەوە.