عێراق پێشوازی لە کاروانێکی دیکەی پەنابەرانی لوبنان دەکات

ئاڤا نیوز

 

حکومەتی عێراق لە چوارچێوەی یارمەتییەکانی بۆ هاووڵاتیانی لوبنان، پێشوازیی لە 897 پەنابەری دیکە کرد، کە بەهۆی جەنگەوە وڵاتەکەیان جێهێشتووە.

 

وێنە گەورەکە: بەهۆی جەنگی نێوان ئیسرائیل و حیزبوڵڵای لوبنان زیاتر لە ملیۆنێک هاووڵاتی لوبنانی پەنابەر و ئاوارە بوونە، عێراق تا ئێستا پێشوازیی لە هەزاران پەنابەر کردووە.

 

ڕاگەیێنراوی فەرمی: وەزارەتی کۆچ و کۆچبەرانی عێراق ڕایگەیاند: بە پشتبەستن بە ڕێنماییەکانی سەرۆکوەزیران و وەزیری کۆچ و کۆچبەران پێشوازییمان لە ژمارەیەکی دیکەی پەنابەرانی لوبنانی کرد لە دەروازەی سنووریی قائیم لە پارێزگای ئەنبار.

 

ئەوەی پێویستە بیزانیت: تاوەکو ڕۆژی شەممەی ڕابردوو، حکومەتی عێراق پێشوازیی لە پێنج هەزار و 693 پەنابەری لوبنانی کردووە، بە هاتنی کاروانێکی دیکەی پەنابەران ژمارەکەیان بۆ شەش هەزار و 590 بەرز دەبێتەوە.