ڕاوێژکاری دارایی سوودانی: ئامادەکاریی بۆ خشتەی بودجەی 2025 دەستیپێکردووە

ئاڤا نیوز

 

ڕاوێژکاری دارایی سەرۆکوەزیرانی عێراق دەڵێت، بە ڕەچاوکردنی دۆخی دارایی هەرێمیی و نێودەوڵەتی بۆ گەرەنتیکردنی بەردەوامی پرۆژەکانی ژێرخان و وەبەرهێنان، ئامادەکارییەکان بۆ خشتەی بودجەی ساڵی 2025 دەستیانپێکردووە.

 

وێنە گەورەکە: بەگوێرەی یاسای بودجەی سێ ساڵە کە ساڵی 2023 پەرلەمانی عێراق پەسەندیکردووە، پێویستە پێش کۆتایی ئەمساڵ حکومەت خشتەی بودجەی ساڵی 2025 ڕەوانە بکات تا دەنگی لەسەر بدرێت و حکومەت لە ساڵی نوێدا بیخاتە بواری جێبەجێکردنەوە.

 

لێدوانی فەرمی: مەزهەر محەممەد ساڵح، ڕاوێژکاری دارایی سەرۆکوەزیرانی عێراق بە ئاژانسی فەرمی عێراقی ڕاگەیاندووە، وەزارەتی دارایی فیدراڵ لە ئامادەکارییەکانی بۆ خشتەی بودجەی ساڵی 2025 بەردەوامە و خشتەی بودجەی ساڵی داهاتووش بە ڕەچاوکردنی دۆخی ئابووری ناوچەکە و نێودەوڵەتی ئامادە دەکرێت.

 

ئەوەشی خستوەتەڕو، لە چوارچێوەی گەشەپێدانی زیاتر بە گەشەی ئابووری بەگشتی و بەرهەمی نانەوتی بەتایبەتی، لە ساڵی داهاتووشدا کارکردن لە پڕۆژە گەورەکان بەردەوام دەبێت کە بەشێکن لە ڕوانگەی حکومەت.