شارەزایەکی ئابووری هۆکارەکانی بەرزبوونەوەی بەهای دۆلار دەخاتەڕوو

ئاڤا نیوز

 

شارەزایەکی ئابووری دەڵێت، گرژییەکانی ناوچەکە و زیادەڕۆیی لە کڕین و هاوردەکردنی کاڵاکان لەدەرەوە و نەبوونی کێبڕکێ لە سیستەمی بانکیی عێراق بەهۆی سزاکانەوە، دیارترین هۆکاری بەرزبوونەوەی دۆلارن.

 

وێنە گەورەکە: ماوەی چەند ڕۆژێکە بەهای دۆلار لە بازاڕەکانی عێراق و هەرێمی کوردستان بەرزبووەتەوە و 100 دۆلار بە دەوروبەری 155 هەزار دینار مامەڵەی پێوەدەکرێت، لەکاتێکدا بانکی ناوەندی 100 دۆلار بە 132 هەزار دینار دەفرۆشێت.

 

لێدوانی فەرمی: مستەفا حنتوش، شارەزای ئابووری بە ئاڤا نیوزی ڕاگەیاند: هۆکاری ناوخۆیی و دەرەکیی و گرژییە سەربازییەکانی ناوچەکە هۆکاری ناجێگریی بەهای دۆلارن، هاوکات بوونی بازرگانییەکی فراوان لەگەڵ ئێران و سوریا و چوونی ملیۆنان گەشتیاری عێراقی بۆ ئەو دوو وڵاتە بەبێ ئەوەی دۆلارییان بە نرخی فەرمی پێبدرێت، لە هۆکارە گرنگەکانی بەرزبوونەوەی بەهای دۆلارن.

 

بە گوتەی ئەو شارەزایە، بوونی ژمارەیەک بازرگان و کۆمپانیا کە مۆڵەتی هێنانی کاڵایان نییە و پێویستیشیان بە دۆلارە، نەبوونی کێبڕکێ لە سیستەمی بانکیدا بەهۆی سزاکان و زیادەڕۆیی لە کڕین و هاوردەکردنی کاڵای بیانی بەهۆی مەترسی شەڕەوە، سێ هۆکاری دیکەن بۆ دابەزینی بەهای دیناری عێراقی لەبەرامبەر دۆلاری ئەمریکیدا، بۆیە بەپێویستی دەزانێت حکومەت دڵنیایی بدات کە هیچ گرفتێک لە ڕێڕەوی بازرگانی و کاشی دۆلار لە عێراقدا نییە.