بەشێک لە گرووپە چەکدارەکانی عێراق پابەندی بڕیاری ڕاگرتنی گرژییەکان نابن

ئاڤا نیوز

 

هەرچەندە حکومەت، مەرجەعی باڵای شیعەکان و چوارچێوەی هەماهەنگی لێکتێگەیشتنیان کردووە کە عێراق نەبێتە بەشێک لە شەڕی ناوچەکە، بەڵام بەشێک لە گرووپە چەکدارەکانی عێراق پابەندی بڕیاری ڕاگرتنی گرژییەکان نەبوون و هێرشەکانیان بۆسەر ئیسرائیل زیاتر کردووە.

 

وێنە گەورەکە: بەشێک لە گرووپە چەکدارەکانی عێراق باوەڕیان وایە پەیامەکەی عەلی سیستانی، مەرجەعی باڵای شیعەکانی عێراق کە دەڵێت "بە هەموو شێوەیەک پشیوانی گەلی لوبنان بن" لەناویاندا پشتیوانیی سەربازیی لەخۆدەگرێت، بەڵام حکومەت و چوارچێوەی هەماهەنگی کۆدەنگن کە تەنیا لە بوارەکانی سیاسی و هاوکاریی مرۆیی هەوڵەکان بۆ پشتیوانی لوبنان بەردەوامی پێبدەن.

 

لێدوانی فەرمی: ڕەحیم عەبوودی، ئەندامی دەستەی گشتیی ڕەوتی حیکمە کە عەممار حەکیم سەرۆکایەتی دەکات و بەشێکە لە چوارچێوەی هەماهەنگی ڕایگەیاند، سەرکردەکانی چوارچێوەی هەماهەنگی لەگەڵ بەرەی مقاوەمە گەیشتوونەتە لێکتێگەیشتن کە هەمووان پابەندی داواکارییەکەی مەرجەعییەتی شیعەکان بن کە بریتییە لەوەی عێراق نەبێتە بەشێک لە شەڕ و گرژییەکانیش ڕابگیرێن.

 

بەگوتەی ئەو بەرپرسە هەرچەندە بەشێک لە گرووپەکان پابەندی بڕیارەکە نەبوون و بەردەوامن لە هێرشکردنەسەر ئیسرائیل، بەڵام ئەوە کاریگەری لەسەر کۆدەنگی بڕیاری عێراق نابێت کە بڕیاری داوە نەبێتە گۆڕەپانی شەڕ و بۆ پاراستنی ئارامی ناوچەکە و بەدیهێنانی ئاشتیش هەموو هەوڵێک دەدات.

 

لەلایەکی دیکەوە: گرووپە چەکدارەکانی عێراق نایشارنەوە گۆڕەپانی ڕووبەڕووبوونەوە لە یەمەن، لوبنان، عێراق، سووریا و ئێران یەکێکە، بۆیە هەر کاتێک ئیسرائیل هێرشێکی گەورە بکاتەسەر یەکێک لەو پێنج وڵاتە، ئەوانیش هەموو بەرەکانی لە دژ دەکەنەوە.