قۆناغی دووەمی هاوتاکردنی مووچەی خانەنشینان دەستپێدەکات

ئاڤا نیوز

مووچەی بەشێکی دیکەی خانەنشینانی مەدەنی و پلەدارانی سەربازی لەگەڵ عێراق هاوتا دەکرێت، ئەو کەسانە دەگرێتەوە لە ساڵانی 2003 تاوەکو 2013 خانەنشین کراون.

وێنە گەورەکە: دوو مانگە بەشێکی خانەنشینانی هەرێمی کوردستان مووچەیان لەگەڵ عێراق هاوتا کراوە، بەڵام لە پارێزگاکانی هەولێر، سلێمانی، هەڵەبجە و ئەو خانەنشینانەی پێش ساڵی 2014 خانەشین بوون، خرانە قۆناغی دووەم.

لێدوانی فەرمی: سادق عوسمان، گوتەبێژی یەكێتیی خانەنشینانی كوردستان بە ئاڤا نیوزی گوت: "بەگوێرەی ڕێنماییەکی نوێ قۆناغی دووەمی هاوتاکردن دەستپێدەکات، ئەو کەسانە دەگرێتەوە لەدوای ساڵی 2003 تاوەکو 31-12-2013 خانەنشین بوون."

زانیاریی زیاتر: ئەو کەسانەی پێش 2014 خانەنشین بوون، زیاتر لە 50 هەزار مووچەخۆرن و تاوەکو مووچەی مانگی 11 مووچەی سەرجەمیان هاوتا دەکرێت.

ئەوەی پێویستە بیزانیت: خانەنشینانی مەدەنی ژمارەیان 149 هەزار و 687 کەسە، ئەوانەی پێش 2014 خانەنشینکراون لە قۆناغی یەکەمدا 100 هەزار دینار خرایە سەر مووچەیان، دوای هاوتاکردن مووچەکانیان زیاتر دەبێت.