چارەنووسی مووچەی چوار مانگی مامۆستایانی گرێبەست ئاشکرا دەکرێت

ئاڤا نیوز

 

نوێنەری مامۆستایانی گرێبەست چارەنووسی مووچەی چوار مانگی مامۆستایانی گرێبەست ئاشکرا دەکات و دەڵێت هیچیان نافەوتێن و هەفتەی داهاتوو یەکێکیان خەرج دەکرێت.

ڕاگەیێنراوی فەرمی: کارۆخ عەبدوڵڵا گوڵاوی، نوێنەری گشتیی مامۆستایانی گرێبەست وادەی دابەشکردنی شایستەی دارایی سێ مانگی مامۆستایانی وانەبێژ و مووچەیەکیشیان وەکو مامۆستای گرێبەست دەخاتەڕوو.

 

ـــ لە سەرەتای هەفتەی داهاتووەوە ڕۆژی یەکشەممە دەست بە دابەشکردنی شایستەی مانگی (6)ی مامۆستایانی گرێبەست دەکرێت لە سەرجەم پەروەردەکانی ( هەولێر، سلێمانی، دهۆک، گەرمیان، هەڵەبجە، زاخۆ، سۆران و ڕاپەڕین ).

ـــ دەربارەی مووچەی مانگی (9)ی مامۆستایانی گرێبەست لەگەڵ وەزارەتی پەروەردە دابەش دەکرێت، بۆ ئەم مەبەستە نووسراوی فەڕمی بۆ ئەنجوومەنی وەزیران کراوە، بۆ ئەوەی تەمویلی پارەکەیان بکرێت لەڕێگای وەزارەتی دارایی بۆ بانکەکان، بۆ ئەوەی مانگانە مووچەی مامۆستایانی گرێبەست لەگەڵ وەزارەتی پەروەردە دابەش بکرێت.

ـــ بۆ شایستەی مانگەکانی (7، 8) کە نیو مقطوتە، دوای مووچەی مانگی نۆ لە دەرفەتێکدا بەیەکەوە دابەش دەکرێن، بۆیە ئەم شایستەیە نافەوتێت.

لەلایەکی دیکەوە: لە ئێستاوە مامۆستایانی گرێبەست لە پەروەردەکان مامەڵەی گرێبەست دەکەن، دوای تەواو بوونیان ڕاستەخۆ لە بانکەکان بایۆمەتەری (UPN) یان بۆ دەکرێت. 

 

ئەمەش بزانە: ژمارەی مامۆستایانی گرێبەست لە هەرێمی کوردستان 37 هەزار و 933 مامۆستایە، مووچەی هەر مامۆستایەک بڕوانامەی دیبلۆم 400 هەزار و بڕوانامەی بەکالۆریۆس 500 هەزار دینارە، پارەی پێویست بۆ مووچەیان مانگانە نزیکەی  18 ملیار دینارە.