هەزاران پڕۆژەی پیشەسازی لە عێراق لەکار کەوتوون

ئاڤا نیوز

بەهۆی گەندەڵی و خراپی دۆخی ئەمنی و قەیرانە یەک لەدوا یەکەکان لە عێراق ، هەزاران پڕۆژەی پیشەسازی لە عێراق لەکار کەوتوون.

 

وێنە گەورەکە: بەپێی ئاماری فەرمی وەزارەتی پیشەسازی عێراق لە ساڵی 2003 ـەوە تاکو ئێستا 18 هەزار و 167 پڕۆژەی پیشەسازی بە هۆکاری جیاجیا کارەکانیان ڕاگرتووە.

 

لێدوانی فەرمی: حەسەن زیادی، ئەندامی یەکێتی پیشەسازانی عێراق ڕایگەیاند: عێراق پێش ساڵی 2003 خاوەن گارگەی پیشەسازی هەمەجۆر بوو، بەڵام لە بیست ساڵی ڕابردوودا بەهۆی گەندەڵی و کەمتەرخەمی، هەزاران پڕۆژەی پیشەسازی لەکار کەوتوون.

 

لەلایەکی دیکەوە: نەبیل تەمیمی پسپۆری ئابوریی ڕوونیکردەوە، پێش ساڵی 2003 کارگەکانی عێراق بەسەر کەرتی گشتی و تایبەتدا دابەشبوون، کارگەکانی کەرتی گشتی بەهۆی داڕمانی هێڵەکانی بەرهەمهێنانەوە لەکارکەوتن، دەوڵەتیش بەهۆی گەمارۆی ئابوورییەوە نەیتوانی نوێیان بکاتەوە، زۆربەی کارگەکانی کەرتی تایبەتیش ڕووبەڕووی کێشەی گەورەی دارایی بوونەوە.

زانیاریی زیاتر: تەمیمی ئاماژەی بەوەش کرد، ئێستا هەندێک یاسای گرنگ لەبەرژەوەندی کەرتی پیشەسازیی کارا کراون، وەک یاسای پاراستنی بەرهەمی ناوخۆیی و یاسای پاراستنی بەکاربەر و زیادکردنی باج لەسەر کاڵای هاوردەکراو، ڕەنگە لەداهاتوویەکی نزیکدا بەشێک لەکارگەکان بکەونەوە کار.