لە بەغدا گردبوونەوەیەکی ناڕەزایەتیی دژی ئیسرائیل بەڕێوەدەچێت

ئاڤا نیوز

 

لایەنگرانی گرووپە چەکدارییە شیعییەکان و بەرەی مقاوەمەی ئیسلامی لە عێراق، گردبوونەوەیەکی ناڕزایەتییان لە ناوەڕاستی بەغدا ئەنجامدا، دژی بەردەوامی هێرشەکانی ئیسرائیل بۆسەر لوبنان و بەکارهێنانی وێنەی مەرجەعی باڵای شیعەکان لەلایەن میدیای ئەو وڵاتەوە. 

 

وێنە گەورەکە: هێرشەکانی ئیسرائیل بۆسەر لوبنان و کوشتن و بریندارکردنی هاووڵاتییانی مەدەنی و خراپ ناوبردنی کەسایەتی و سەرکردە شیعییەکان لەلایەن میدیاکانی ئیسرائیلەوە، گرووپە چەکدارییەکان و پشتیووانانیانی توڕە کردووە و لە پاڵ هێرشە درۆنییەکان، خۆپیشاندانیش دژی ئیسرائیل بەڕێوەدەچێت.

 

زانیاریی بەدەستهاتوو: سەدان لایەنگرانی گرووپە چەکدارەکان لە گۆڕەپانی تەحریر گردبوونەوە و لەژێر ناونیشانی "بەدڵنیاییەوە لە بەرامبەر قەوارەی زایۆنیستی سەرکەوتن بەدەستدەهێنین کە کۆمەڵکوژی دژی گەلی فەلەستین و گەلی لوبنان ئەنجام دەدات".

 

ئەوەی پێویستە بیزانیت: ڕۆژی سێشەممە، کەناڵی 14ی ئیسرائیلی وێنەیەکی عەلی سیستانی، مەرجەعی باڵای شیعە مەزهەبەکانی عێراقی لە پاڵ ژمارەیەک سەرکردەی حیزبوڵڵای لوبنان و سوپای پاسداران و فەیلەقی قودس و حەماس بڵاوکردەوە، گوایە ئەو کەسانە لە لیستی بە ئامانجگرتنی ئیسرائیلن.