مقاوەمەی ئیسلامیی عێراق لە ڕێگەی دوو درۆنەوە هێرشی کردە سەر ئیسرائیل

ئاڤا نیوز 

 

بەرەی مقاوەمەی ئیسلامی لە عێراق لە ڕێگەی دوو فڕۆکەی بێ فڕۆکەوانەوە هێرشی کردە سەر ئامانجێکی ئیسرائیل لە جۆلان، ئاماژە بۆ ئەوەش دەکات ئەمە هێرشی دووەمیانە لە ئەمڕۆدا. 

 

وێنە گەورەکە: سەرەڕای بەردەوامیی هەوڵەکانی دەسەڵاتدارانی عێراق بۆ دوورخستنەوەی وڵاتەکە لە گرژییەکان، بەڵام گرووپە چەکدارەکان لە خاکی عێراقەوە بەردەوامن لە هێرشکردنە سەر پێگەکانی ئیسرائیل.

 

ڕاگەیێنراوی فەرمی: مقاوەمەی ئیسلامیی عێراق بڵاویکردەوە، سەر لەبەیانی ئەمڕۆ شەممە 12-10-2024، لە ڕێگەی دوو فڕۆکەی بێ فڕۆکەوانەوە هێرشیان کردووەتە سەر پێگەیەکی ئیسرائیل لە جۆلان، جەختیش لە بەردەوامیی هێرشەکانیان دژی ئیسرائیل دەکاتەوە.

 

ئەوەی پێویستە بیزانیت: زیادبوونی هێرشی گرووپە چەکدارییەکانی عێراق بۆسەر ئیسرائیل مەترسی کاردانەوەی ئەو وڵاتەی زیاتر کردووە، بەشێک لە بەرپرسانی عێراق پێشبینی دەکەن لە کاردانەوەی هێرشەکاندا، بنکە و بارەگاکانی حەشدی شەعبی، گرووپە چەکدارەکان و سەرکردەکانیان بکرێنە ئامانج.

 

ئەمەش بزانە: یوواڤ گالانت، وەزیری بەرگریی ئیسرائیل دەڵێت، سوپای وڵاتەکەی دەستی بەهەموو ناوچەیەکی ڕۆژهەڵاتی ناوەڕاست دەگات و "بەتووندی"یش ڕووبەڕووی ئەو هەڕەشانە دەبێتەوە کە لە عێراق و وڵاتانی دیکەوە دەکرێتە سەریان.

 

لەلایەکی دیکەوە: فادی شمەری، ڕاوێژکاری سیاسیی سەرۆکوەزیرانی عێراق دەڵێت، حکومەتی عێراق لەڕێگەی کاری دیپلۆماسییەوە هەوڵی ڕاگرتنی گرژییەکانی ناوچەکە دەدات، چونکە حکومەتەکەی سوودانی حکومەتی مقاوەمە نییە، بەڵکو حکومەتێکە لەنێوان ژمارەیەک لایەنی سیاسی پێکهێنراوە کە بیروباوەڕیان بۆ پرسەکان جۆراوجۆرە.