مەندەلاوی: ناوچەکە لە شەڕ دوور بخرێتەوە

ئاڤا نیوز

 

سەرۆکی پەرلەمانی عێراق بە وەکالەت دەڵێت، بەردەوامی شەڕ کاریگەری نەرێنی لەسەر گەشەپێدانی ناوچەکە هەبووە، بۆیە ئێستا عێراق سەرنجی لەسەر ئەوەیە شەڕ لە ناوچەکە دووربخاتەوە.

 

وێنە گەورەکە: عێراق لەسەر ئاستی حکومەت و پەرلەمانیش چەندینجار داوای لە وڵاتانی عەرەبی، ئیسلامی و نەتەوە یەکگرتووەکان کردووە بەیەک هەڵوێست کاربکەن تا ئیسرائیل ناچار بکەن هێرشەکانی بۆسەر فەڵەستین و لوبنان ڕابگرێت و ڕێگری بکەن لەوەی شەڕ فراوانتر ببێت.

 

لێدوانی فەرمی: موحسین مەندەلاوی، سەرۆکی پەرلەمانی عێراق بە وەکالەت لە کۆبوونەوەیدا لەگەڵ باڵیۆزانی وڵاتانی کەنداو لە بەغدا، ئاماژەی بەوەکرد، عێراق و وڵاتانی کەنداو کار لەسەر هەوڵی هاوبەش بۆ کەمکردنەوەی گرژییەکانی ناوچەکە دەکەن، چونکە کاریگەری لەسەر هەموو وڵاتانی جیهان دروستکردووە.

 

سەرۆکی پەرلەمان ئاشکراشی دەکات، گرژییەکان کاریگەری نەرێنییان لەسەر کەرتەکانی وزە، گەشەپێدان، وەبەرهێنان و گواستنەوە لە وڵاتانی ناوچەکە هەبووە، جەختیش دەکاتەوە کە بەهیچ شێوەیەک نابێت ڕێگە بە ئامانجگرتنی عەلی سیستانی، مەرجەعی باڵای شیعەکان بدرێت، چونکە ناوبراو هۆکارێکی کاریگەری پاراستنی ئاسایش و ئارامی ناوچەکەیە.