سعودیە 21 عەمرەکاری عێراقی دەستگیر دەکات

ئاڤا نیوز

 

ئەندامێکی پەرلەمانی عێرق دەڵێت، سعودیە 21 عەمرەکاری عێراقی دەستگیرکردووە و دەبێت حکومەت دەستوەردان بکات و سنورێک بۆ ئەو دەستگیرکردنانە دابنێت.

 

وێنە گەورەکە: ساڵانە هەزاران هاووڵاتی عێراقی بەمەبەستی ئەنجامدانی فەریزەی حەج و عومرە سەردانی سعوودیە دەکەن، بەشێک لەو هاووڵاتیانەش بەهۆکاری وەک بەکارهێنانی ڤیزای گەشتیاری لەجێگەی ڤیزای حەج و چەند هۆکارێکی دیکە، لە سعودیە ڕووبەڕووی گرفتی یاسایی دەبنەوە.

 

ڕاگەیێنراوی فەرمی: حەبیب حەلاوی، سەرۆکی فراکسیۆنی سادیقون لە  پەرلەمانی عێرق لەهەژماری خۆی لە تۆڕی کۆمەڵایەتی ئێکس بڵاویکردەوە، "داوا لە وەزارەتی دەرەوەی عێراق دەکەین دەستوەردانی خێرا بکات بۆ ڕاگرتنی ئەو دەستبەسەرکردنە دووبارانەی دەسەڵاتدارانی سعوودیە بەرامبەر حاجی و عەمرەکارانی عێراق کە بە هۆکاری ناڕەوا و بێ پێشینەیان ئەنجامی دەدەن، لەم دواییانەشدا 21 هاووڵاتی عێراقییان دەستگیرکردووە".

 

بە وتەی ئەو پەرلەمانتارە، دەستگیرکردنەکان بێ هۆکارن و پێشێلکردنی مافی هاووڵاتیانی عێراقن، بۆیە داوای لە وەزارەتی دەرەوەی وڵاتەکەی کرد بەرپرسیارییەتی خۆی بۆ پاراستنی هاووڵاتیانی عێراق لە دەرەوە لە ئەستۆ بگرێت و ڕێگەش نەدات ڕووداوی هاوشێوە دووبارە ببنەوە.