زیاتر لە 30 کەس لەسەر لە بردنی ئاسنی پۆستەری کاندیدەکان دەستگیرکراون

ئاڤا نیوز

 

لەگەڵ تەواو بوونی وادەی بانگەشەی هەڵبژاردنی خولی شەشەمی کوردستان، چەند کەسێک لە شار و شارۆچکەکانی هەرێمی کوردستان پۆستەری کاندیدەکانیان هەڵگرتووەتەوە بۆ بەکارهێنان و فرۆشتنەوەی ئاسنەکەی، کە ژمارەیەکیان دەستگیرکراون و ڕەوانەی دادگە دەکرێن.

 

وێنە گەورەکە: کۆمیسیۆنی سەربەخۆی هەڵبژاردنەکانی عێراق وادەی 30 ڕۆژی بۆ کاندید و لایەنەکان داناوە، بۆ ئەوەی سەرجەم فلێکس، ئاڵا و پۆستەرەکانی بانگەشە هەڵگرنەوە ئەگەرنا لەلایەن شارەوانی لادەدرێن و تێچووەکەی لەسەر کاندید و لایەنەکان هەژمار دەکرێت، جگە لەوەی ڕووبەڕووی یاسا دەکرێنەوە.

 

ئەمەش بزانە: ئەو وادە 30 ڕۆژییەی کۆمیسیۆن بۆ لایەن و کانیدەکان بۆ لابردنی پۆستەرەکان دایناوە لە دوای بەڕێوەچوونی هەڵبژاردنی گشتیی پەرلەمان لە 2024/10/20 دەستپێدەکات.

 

زانیاریی بەدەستهاتوو: بەگوێرەی بەدواداچوونی ئاڤا، لە چەند هەڵمەتێکدا لە هەولێر، دهۆک، سلێمانی و هەڵەبجە زیاتر لە 30 کەس لەسەر بردنی ئاسنی پۆستەرەکان دەستگیرکراون و ڕەوانەی دادگە دەکرێن.

 

لێدوانی فەرمی: هێمن سلێمان، گوتەبێژی پۆلیسی دهۆک بە ئاڤا نیوزی گوت، "ئەم کەسانە بەگوێرەی یاساکانی کۆمیسیۆن سزا دەدرێن، بەدواداچوون بۆ دەستگیرکردنیان بەردەوامە و هەر کەسێک ئاسنی پۆستەرەکان ببات دەستگیر دەکرێت."

 

لەلایەکی دیکەوە: عەبدوڵڵا وەیسی، سەرۆکی یەکێتیی زانایانی ئایینی ئیسلامی کوردستان بە ئاڤا نیوزی ڕاگەیاند، "بردنی ئاسنی پۆستەری کاندیدەکان کە خۆی ئاگادار نەبێت حەرامە و لەڕووی شەرعەوە دەچێتە چوارچێوەی دزی."