سەرۆكوەزیران مەسرور بارزانی بەردی بناغەی 21 پڕۆژەی لە مێرگەسۆر دانا

ئاڤا نیوز

 

لەڕێوڕەسمێكدا، سەرۆكوەزیران مەسرور بارزانی، بەردی بناغەی 21 پڕۆژەی خزمەتگوزاریی تایبەت بە قیرتاوكردنی ڕێگا، شەقام، دروستكردنی پرد، ئاو و ئاوەڕۆی لە قەزای مێرگەسۆر دانا.

 

لێدوانی فەرمی: سەرۆكوەزیران مەسرور بارزانی ڕایگەیاند: ئەم پڕۆژانە خزمەت و ئاسانکارییەکی باش بە هاووڵاتییانی گوند و شارۆچکەکانی دەڤەرەکە دەکەن و بەرنامەی حکومەتیش ئەوە بووە کە گرنگی تەنیا بە سەنتەری شارە گەورەکان و پارێزگاکان نەدرێت، بەڵکو کار و پرۆژە خزمەتگوزارییەکان بگەیەنێتە هەموو گوند و دێهات و شارۆچکەکانیش بۆ ئەوەی هەموو هاووڵاتییانی کوردستان سوودمەند بن لە خزمەتگوزارییە گشتییەکان.

 

لەلایەكی دیكەوە: سەرۆكوەزیران مەسرور بارزانی ئاماژەی بە ئەوەش دا: ئامانجێکی دیکەی حکومەت پێشخستنی باری ئابووری و ڕەخساندنی هەلی کارە بۆ دانیشتووانی گوندەکان لە ڕێگەی پڕۆژەی بچووک و مامناوەند، وەکو دروستکردنی کارگەی پێویست لەم دەڤەرانە، کە لەلایەک دەبێتە زیاتربوونی داهاتی خەڵک و لەلایەکی دیکە داهاتی گشتیش زیاتر دەبێت.

 

سەرۆكوەزیران ئەوەشی گوت: "دەڤەری بارزان، دەڤەرێکی ستراتیژییە و مەڵبەندی سەرەکیی شۆڕش و ڕاپەڕینەکانی کوردستان بووە و لە سەد و بیست ساڵی ڕابردوودا، ئەم دەڤەرە ڕێبەرایەتیی بزووتنەوەی ئازادیخوازی خەڵکی کوردستانی کردووە و دەستکەوتی زۆری بۆ خەڵکی کوردستان بەدەسهێناوە. بۆیە دوژمنانی کوردستان هەمیشە دژایەتیی بارزان و خەڵکی دەڤەری بازرانیان کردووە، چونکە خەڵکی ئەم دەڤەرە هیچ جارێک سەری خۆیان بۆ دوژمن شۆڕ نەکردووە".

 

ئەوەشی خستە ڕوو: ئەوانەی خەونیشیان بە تێکدانی بارزان یان شۆڕشی کوردستان بینیبێت ئێستا لە گۆڕدان، بۆیە بە پشتیوانی خوای مەزن، کوردستان و بارزان هەمیشە سەربڵند و پارێزراو دەبن و ئێمەش بەردەوام دەبین لە بەرنامەکانمان بۆ ئاوەدانکردنەوەی هەموو گوند و دێهاتەکانی کوردستان.