بەرەی مقاوەمەی عێراق بە درۆن باشووری ئیسرائیل دەکاتە ئامانج

ئاڤا نیوز

بەرەی مقاوەمەی ئیسلامی لە عێراق ڕایدەگەیێنێ، سەرلەبەیانی ئەمڕۆ بە فڕۆکەی بێفڕۆکەوان پێگەیەکی گرنگی ئیسرائیلی لە باشووری ئەو وڵاتە کردووەتە ئامانج، جەختیش لە بەردەوامی هێرشەکان دەکاتەوە.

وێنە گەورەکە: سەرەڕای بەردەوامی هەوڵەکانی حکومەتی عێراق بۆ دوورخستنەوەی وڵات لە گرژییەکان و شەڕی ئیسرائیل لەگەڵ حەماس و حیزبوڵڵای لوبنان، بەڵام گرووپە چەکدارەکانی نزیک لە ئێران وەک پاڵپشتییەک بۆ حیزبوڵڵا لە خاکی عێراقەوە بەردەوامن لە هێرشکردنە سەر ئیسرائیل.

ڕاگەیێنراوی فەرمی: بەرەی مقاوەمەی ئیسلامی لە عێراق ڕایگەیاند: سەرلەبەیانی ئەمڕۆ پێنجشەممە بە فڕۆکەی بێفڕۆکەوان پێگەیەکی گرنگی ئیسرائیلیان لە دەوروبەری شاری ئیلاتی باشووری ئەو وڵاتە کردووەتە ئامانج، جەختیش لە بەردەوامی هێرشەکان دژی ئیسرائیل دەکاتەوە.

ئەوەی پێویستە بیزانیت: حکومەتی عێراق پەیوەست بە گرژییەکانی ناوچەکە جەخت لە هەوڵی چارەسەری دیپلۆماسی دەکاتەوە، بەڵام لەدوای کوژرانی حەسەن نەسروڵڵا، ئەمینداری گشتیی حیزبوڵڵای لوبنان لە کۆتایی مانگی ڕابردوو، گرووپەکانی بەرەی مقاوەمە لە عێراقەوە دەیان هێرشیان کردوونەتە سەر ئیسرائیل.