هێزە ئەمنییەکانی عێراق بازرگانێکی کریستاڵ لە بەغدا دەستگیر دەکەن

ئاڤا نیوز 

 

ئاسایشی نیشتمانیی عێراق بازرگانێک لە بەغدا دەستگیر دەکات، کە کاری دروستکردنی ماددەی هۆشبەر لە جۆری کریستاڵ بووە لە پارێزگای سلێمانی.

 

وێنە گەورەکە: لە دوایین ڕاپۆرتی خۆیدا نەتەوەیەکگرتووەکان هۆشداریی داوە لەوەی عێراق خەریکە دەبێتە ناوەندێکی گەورەی ماددەی هۆشبەر لەسەر ئاستی وڵاتانی ڕۆژهەڵاتی ناوەڕاست، هۆشداریی لەوەش دەدات سلێمانی بووەتە ناوەندێک بۆ بەرهەمهێنان و گواستنەوەی ماددەی هۆشبەر.

 

ڕاگەیێنراوی فەرمی: دەزگای ئاسایشی نیشتمانیی عێراق ڕایگەیاند: دوای هەشت مانگ لە بەدواداچوون ئاسایشی نیشتمانیی توانیی بازرگانێکی نێودەوڵەتیی ماددەی هۆشبەری کریستاڵ دەسبەسەر بکات.

 

شێوازی جێبەجێکردن: وەک ئاسایشی نیشتمانیی عێراق، ئاماژەی بۆ دەکات لە بەسرەوە تیمێک پێکهێنراوە بۆ پەلکێشکردنی بازرگانەکە و ئاشکراکردنی پلانەکانی، پلانەکەش بۆ ئەوە بووە ئەو بازرگانە بێت و بازرگانە نێوخۆییەکان فێری چۆنیەتی دروستکردن و ئامادەکردنی ماددەی کریستاڵ بکات.

 

زانیاریی زیاتر: بە گوێرەی ئاسایشی نیشتمانیی: بازرگانەکە لە سلێمانی نیشتەجێبووە و لە ئاستی نێودەوڵەتیدا بازرگانی بە ماددە هۆشبەرە کردووە.

 

لەلایەکی دیکەوە: هەر بەپێی ڕاگەیێنراوەکەی ئاسایش، دوای ئەوەی بازرگانەکە لە سلێمانیی پەلکێشی بەغدای دەکەن، لەوێ هێزەکانیان هەڵدەکوتنە سەر شوێنەکەی و لەکاتی دروستکردنی ماددەی کریستاڵ دەستگیری دەکەن، بەهۆی دانپێدانانەکەشیەوە گوێزەرەوەی سەرەکی ماددە هۆشبەرەکە دەستگیر دەکەن.