یەکێتی ئەوروپا و پێنج لایەنی عێراقی پیرۆزبایی هەڵبژاردن لە هەرێمی کوردستان دەکەن

ئاڤا نیوز

 

یەکێتی ئەوروپا پێنج لایەنی عێراقی پێشوازیی لە بەڕێوەچوونی هەڵبژاردنی پەرلەمانی کوردستان دەکەن و داواش لە لایەنە سیاسییەکان دەکات کار بکەن بۆ پێکهێنانی کابینەی نوێی حکومەتی هەرێمی کوردستان.

 

وێنە گەورەکە: یەکێتی ئەوروپا و  پێنج لایەنی عێراقی لەبارەی هەڵبژاردنی پەرلەمانی کوردستان پەیامێکیان ئاراستەی حکومەتی هەرێمی کوردستان کرد و پیرۆزباییش لەلایەنە بەشداربووەکانی هەڵبژاردن دەکەن.

 

 نێردەی یەکێتی ئەوروپا لە عێراق: پێشوازی لە بەڕێوەچوونی هەڵبژاردنی پەرلەمانی کوردستان دەکەین و داوا لە هەموو لایەنەکان دەکەین، چونکە ئەوە لە بەرژەوەندی یەکێتی و ئارامی هەرێمی کوردستان و تەواوی عێراقیش دایە.

 

هاوپەیمانی نەسر: لە ڕێگەی تیمە میدیاییەکانمان و تیمە نێودەوڵەتییەکان چاودێریی هەڵبژاردنەکەمان کرد و باشترین پرۆسە ئەنجامدرا و هەڵبژاردنێکی شەفاف و دوور لە ساختەکاری بوو.

 

هاوپەیمانی نیشتیمانی: هەڵبژاردنی پەرلەمانی کوردستان هەنگاوێکە بە ئاڕاستەی بەهێزکردنی چاکسازییەکان و گەشەپێدان، بۆ قۆناغی داهاتووش چاوییان لەوەیە پەرلەمان و حکومەتی نوێی هەرێمی کوردستان ئەو دوو بنەمایە زیاتر و زیاتر پێش بخەن.

 

هاوپەیمانی عەزم: بۆ باش ڕێکخستنی ئەو پرۆسەیە پێزانینی هەیە بۆ ڕۆڵی حکومەتی هەرێمی کوردستان، کۆمیسیۆنی هەڵبژاردنەکانی عێراق، جەختیش دەکاتەوە کە کارایی و بەشداریی حیزبەکان و هاوپەیمانییە سیاسیەکان لە هەڵبژاردنەکەدا، بوونە هۆی سەرکەوتنی ئەو پرۆسە دیموکراسییە.

 

عەممار حەکیم، سەرۆکی ڕەوتی حیکمەی نیشتیمانی لە پەیوەندییەکی تەلەفۆنیدا لەگەڵ سەرۆکوەزیران مەسرور بارزانی،  پیرۆزبایی سەرکەوتنی هەڵبژاردنی پەرلەمانی کوردستان کردووە.

 

سەرۆکی پەرلەمانی عێراق بە وەکالەت: بۆ سەرکەوتنی هەڵبژاردنی پەرلەمانی کوردستان پیرۆزبایی لە سەرۆکایەتی هەرێمی کوردستان، حکومەتی هەرێمی کوردستان و گەلی هەرێمی کوردستان دەکات، هاوکات پێزانینی هەیە بۆ هەوڵەکانی کۆمیسیۆن و هێزە ئەمنییەکان کە ڕۆڵی کاریگەریان هەبووە بۆ سەرکەوتنی پرۆسەکە.