ئەو كاندیدە دەرچووانەی ناچنە پەرلەمان

ئاڤا نیوز

 

ژمارەیەك كاندید لە چەند حیزبێكی جیاواز، هەرچەندە دەنگی پێویستیان لە هەڵبژاردنی پەرلەمانی كوردستان بەدەستهێناوە، بەڵام ناچنە پەرلەمان.

 

وێنە گەورەكە: كۆمسیۆنی باڵای سەربەخۆی هەڵبژاردنەكانی عێراق لە كۆنفڕانسێكی ڕۆژنامەوانیدا لە شاری بەغدا ئەنجامی بەرایی هەڵبژاردنی پەرلەمانی كوردستانی ئاشكرا كرد.

چیرۆکی سەرەکی: ژمارەیەك كاندیدی دەرچووی هەڵبژاردنی ئەمجارە پۆستی حیزبی یاخود حكومییان هەیە و بەو هۆیەوە ناچنە پەرلەمان و كاندیدی دیكە لە شوێنی خۆیان دەنێرن.

 

- شاڵاو كۆسرەت ڕەسوڵ، سەرۆكی بازنەی هەولێری لیستی یەكێتی كە ئەندامی سەركردایەتیی حیزبەكەیە و د.میران محەممەد، سەرۆكی بازنەی سلێمانیی یەكێتی كە ئەندامی مەكتەبی سیاسییە، بەهۆی پۆستە حیزبییەكانیان ناچنە پەرلەمان ئەگەرچی دەنگی پێویستیشیان بەدەستهێناوە.

 

- لاهور شێخ جەنگی، سەرۆكی لیستی بەرەی گەل لە سلێمانی كە سەرۆكی ڕەوتەكەیە، هەرچەندە دەنگی پێویستی بۆ بوون بە ئەندامی پەرلەمانی كوردستان بەدەستهێناوە، بەڵام بەهۆی پۆستەكەی ناچێتە پەرلەمان و كاندیدێكی دیكە كە دوای ئەو زۆرترین دەنگی بەرەی گەلی بەدەستهێنابێت لە شوێنی خۆی بۆ پەرلەمان دەنێرێت.

 

- لە پارتی دیموكراتی كوردستان هەڵگورد شێخ نەجیب كە لە بازنەی هەولێری پارتی زۆرترین دەنگی بەدەستهێنا و هاوكات سەرۆكی ئیدارەی سەربەخۆی سۆرانە، لە پۆستەكەی خۆی دەمێنێتەوە و ناچێتە پەرلەمان.