دادگای کارگێڕی لەبارەی یاساییبوونی ئیداره و ئەنجوومەنی پارێزگای کەرکووک کۆدەبێتەوە

ئاڤا نیوز 

 

دادگای کارگێڕی لە کەرکووک لەسەر بنەمای داواکاریی ژمارەیەک لە ئەندامانی ئەنجوومەنی پارێزگای کەرکووک لە یاساییبوونی ئیدارە و ئەنجوومەنی پارێزگاکە دەکۆڵێتەوە.

 

زانیاریی بەدەستهاتوو: سەرچاوەکی ئاگادار ئەوەی بۆ میدیای عێراق ئاشکرا کردووە کە ئەمڕۆ سێشەممە 22-10-2024، دادگای کارگێڕی لە ئەنجوومەنی باڵای دادوەری لەسەر سکاڵای ژمارەیەک لە ئەندامانی ئەنجوومەنی پارێزگای کەرکووک، لە یاساییبوونی ئیدارە و ئەنجوومەنی پارێزگاکە کۆدەبێتەوە.

 

زانیاریی زیاتر: هەریەک لە حەسەن مەجید و شوخان حەسیب سکاڵایان لەسەر یاساییبوونی ئیدارەو ئەنجوومەنی پارێزگاکە کردووە، هاوکات دۆسیەی ئەندامە عەرەب و تورکمانەکان کە سکاڵایان لە دژی سەرۆکی ئەنجوومەنی پارێزگای کەرکوک کردووە و داوای هەڵوەشاندنەوەی بڕیارەکانی دانیشتنی 10ی ئاب دەکەن کە تێیدا ڕێبوار تەها وەک پارێزگاری کەرکووک هەڵبژێردرا.

 

ئەوەی پێویستە بیزانیت: ڕۆژی 10ی ئاب ڕێبوار تەها وەک پارێزگاری کەرکووک و محەممەد حافز وەک سەرۆکی ئەنجوومەنی پارێزگا لە بەغدا بەبێ بەشداری ئەندامانی فراکسیۆنی پارتی و ژمارەیەک لە نوێنەرانی عەرەب و تورکمان هەڵبژێردران.

 

ئەمەش بزانە: پێش کۆبوونەوەکەی 10ی ئابی بەغدا، هەریەک لە پارتی دیموکراتی کوردستان و هاوپەیمانی عەرەبی و بەرەی تورکمانی بایکۆتی کۆبوونەوەکەیان کرد و  هاوکات کۆبوونەوەکەیان بە نایاسایی زانی و جەختیان لەوە کردەوە کە بۆ کۆبوونەوەکە بانگهێشت نەکراون.