نەشتەرگەرییەکی گەورەی جوانکاری لە نەخۆشخانەیەکی هەولێر دەکرێت

ئاڤا نیوز

نەشتەرگەرییەکی گەورەی جوانکاری و ڕێککاری شەویلاگ لە نەخۆشخانەی ڕزگاری هەولێر دەکرێت و حەوت کاتژمێر دەخایەنێت.

چیرۆکی سەرەکی: ئەو کەسەی نەشتەرگەرییەکەی بۆ کراوە گەنج بووە، بەڵام لە زکماک شەویلاگی سەرەوەی زۆر لەپاش بووە و شەویلاگی خوارەوەی لەپێش بووە، لە کۆی 28 ددان تەنیا دوو ددانی بەریەک کەوتووە.

لێدوانی فەرمی: د.سەعید توتمەیی، پسپۆڕی نەشتەرگەریی ڕووخسار و شەویلاگ کە سەرپەرشتیی نەشتەرگەرییەکەی کردووە، بە ئاڤا نیوزی ڕاگەیاند: "نەشتەرگەرییەکە ماوەی حەوت کاتژمێری خایاندووە، توانراوە شەویلاگەکانی ڕێکبخرێنەوە و ددانەکانی بەیەک بگەیێنرێن".

بۆچی گرنگە: ئەم جۆرە نەشتەرگەرییانە دەگمەنن و چەند مانگ جارێک لە نەخۆشخانە حکومییەکانی هەولێر دەکرێن، وێڕای ئەوەی متمانەی هاونیشتمانیان بە کەرتی تەندروستی زیاتر دەکات، باری سەر شانی هاونیشتمانیان سووک دەکات و ڕێگریش لە بردنەدەرەوەی داهات بۆ دەرەوەی کوردستان دەکات.

 

ئەمەش بزانە: ئەم نەشتەرگەرییە لە نەخۆشخانە تایبەتەکان لە هەولێر تێچووەکەی زیاتر لە هەشت ملیۆن دینارە، بەڵام لە نەخۆشخانە حکومییەکان تێچووێکی کەمی هەیە، زۆرجاریش هاونیشتمانیان ئەم جۆرە نەشتەرگەرییانە بە هەزاران دۆلار لە دەرەوە دەکەن.