ئاری نانەکەلی: 25 هەزار پەنجەمۆر لەناو هەولێر نەخوێندراوەتەوە

ئاڤا نیوز

لە هەڵبژاردنی خولی شەشەمی پەرلەمانی کوردستان لە بازنەی هەولێر خەڵكێکی زۆر بەهۆی نەخوێندنەوەی پەنجەمۆرەوە دەنگیان نەدا، ئەندامێکی کۆمیتەی ناوەندی پارتیش دەڵێت "تەنیا لە ناوەندی هەولێر 25 هەزار کەس کە زۆرینەی دەنگدەری پارتی بووە، پەنجەمۆری نەخوێندراوەتەوە".

 

لێدوانی فەرمی: ئاری نانەکەلی، ئەندامی کۆمیتەی ناوەندی و بەرپرسی لقی 16ی پارتی بە ئاڤا نیوزی ڕاگەیاند: لە ناوەندی هەولێر 25 هەزار کەس و لە دەوروبەری هەولێریش پێنج تا شەش هەزار کەسی دیکە پەنجەمۆریان نەخوێندراوەتەوە، زۆرینەی ئەوانەش دەنگدەری پارتی بوون.

 

ئاری نانەکەلی دەڵێت: چەند لایەنێک ڕێگربوون لەوەی هەڵبژاردن پێش دوو ساڵ بکرێت، بەتایبەت یەکێتی، چونکە لە خۆی ڕانەدەبینی بەشداری هەڵبژاردن بکات، بۆیە ئاستەنگ و گرفتی دروست دەکرد.

 

زانیاریی زیاتر: دروشمەکانی 'دەیڕوخێنین، دەیسوتێنین' کە هەندێک لایەن بەرزیان دەکردەوە، ترسی لای خەڵک دروستکرد، خەڵک پێیوابوو ئەگەر ئەم لایەنانە حکومڕانی بکەن، ئەوا ژیانیان دەکەوێتە مەترسییەوە.

 

باکگراوند: هەڵبژاردنی گشتیی پەرلەمانی کوردستان لە ڕۆژی 20-10-2024، بەڕێوەچوو، کە تێدا پارتی دیموکراتی کوردستان توانی زۆرترین دەنگ بەدەست بهێنێت، دواتر یەکێتی نیشتمانی کوردستان بە پلەی دووەم و نەوەی نوێ بە پلەی سێیەم دێن.