هۆکاری بەرزبوونەوەی نرخی مریشک ئاشکرا دەکرێت

ئاڤا نیوز

کەمتر لە 20 ڕۆژ پێش هاتنی مانگی ڕەمەزان، نرخی مریشک زیندوو لە بازاڕەکانی هەرێمی کوردستان بەرز بووەتەوە، خاوەنی پرۆژەیەکی پەلەوەر، هۆکارەکەی بۆ بەرزبوونەوەی نرخی هێلکەی هەڵهێنەر و تێچووی هاوردەکردنی دەگەڕێنێتەوە.

 

وێنە گەورەکە: دوو ڕۆژە نرخی مریشک لە پارێزگاکانی هەرێمی کوردستان لە دوو هەزار و 750 دینار بوو، بۆ سەرووی سێ هەزار دینار بۆ هەر کیلۆیەک بەرزبووەتەوە.

 

لێدوانی فەرمی: هاشم حوسێن، خاوەنی دوو پرۆژەی کێڵگەی پەلەوەرییە لە هەولێر بۆ ئاڤا نیوز گوتی: هێلکەی هەڵهێنەر لە وڵاتانی دەرەوە بەرزبووەتەوە، نرخی هەر دانەیەکیان 60 سەنتە، هەر هێلکەیەک 25 سەنتی هاتووەتە سەر جگە لە تێچووی هاوردەکردنی بۆ هەرێمی کوردستان.

 

ئەوەی پێویستە بیزانیت: هێلکەی هەڵهێنەر لە وڵاتانی بەلجیکا، بولگاریا و تورکیا هاوردەی هەرێمی کوردستان دەکرێت، پێشووتر نرخی هەر دانەیەک 35 سەنت بوو، واتە سێ دانە هێلکە بە یەک دۆلار و پێنج سەنت بوو، ئێستا سێ هێلکە بە دۆلارێک و 80 سەنت هاوردە دەکرێت.