وەزیرێکی یەکێتی دەستلەکاردەکێشێتەوە

ئاڤا نیوز

 

وەزیری ژینگەی عێراق کە لەسەر پشکی یەکێتیی نیشتمانی کوردستانە، دەستبەرداری پۆستەکەی دەبێت، هاوکات خۆی بۆ کاری سیاسی حیزبەکەی لە بەغدا تەرخان دەکات.

 

وێنە گەورەکە: نزار ئامێدی، وەزیری ژینگەی عێراق دەستی لەکارکێشایەوە و وەک لێپرسراوی مەکتەبی سیاسیی یەکێتیی لە بەغدا دەستبەکاردەبێت.

 

لێدوانی فەرمی: هەرێم کەماڵ ئاغا، سەرۆکی فراکسیۆنی یەکێتی لە ئەنجوومەنی نوێنەرانی عێراق بە ئاڤا نیوزی ڕاگەیاند: دەستلەکارکێشانەوەکەی وەزیری ژینگەی عێراق بۆ جێبەجێکردنی ڕاسپاردەکانی کۆنگرەی پێنجەمی یەکێتی و پەیڕەوی هەموارکراوی ناوخۆی حیزبەکەیە، کە پێویستە تەواوی ئەندامانی مەکتەبی سیاسیی یەکێتی، خۆیان بۆ کاری مەکتەبی سیاسی تەرخان بکەن و دەستبەرداری هەر پۆستێکی دیکە بنن.

 

زانیاریی زیاتر: غەریب ئەحمەد، ئەندامی ئەنجوومەنی نوێنەرانی عێراق لە فراکسیۆنی یەکێتی بە ئاڤا نیوزی ڕاگەیاند: تاوەکو ئێستا یەکێتی نیشتمانی کوردستان، ناوی هیچ کەسێکی دیکەی بۆ شوێنگرەوەی پۆستی وەزیری ژینگەی عێراق پێشکەش بە ئەنجوومەنی وەزیرانی عێراق نەکردووە، بۆ دیاریکردنی ناوی شوێنگرەوەکەشی، پێویستە سەرۆکی یەکێتی و ئەنجوومەنی سەرکردایەتیی بڕیاری کۆتایی بدەن.

 

گۆشەیەکی دیکەی دیمەنەکە: تاوەکو ئێستا محەممەد شیاع سوودانی، سەرۆکی ئەنجوومەنی وەزیرانی عێراق، واژۆیی لەسەر دەست لە کارکێشانەوەی وەزیری ژینگە نەکردووە.