سوپای عێراق پێگەی چەکدارانی داعش لە سەڵاحەددین دەکاتە ئامانج

ئاڤا نیوز

 

لە ئۆپەراسیۆنێکی هاوبەشدا سوپای عێراق چوار چەکداریی داعشی لە سنووری سەڵاحەددین کردە ئامانج.

 

وێنە گەورەکە: سوپای عێراق بە هاوبەشی لەگەڵ هەواڵگری لە پارێزگای سەڵاحەددین و چەند پارێزگایەکی دیکە، بەردەوام لە بە ئامانجگرتن و دەستگیرکردنی تیرۆریستان و چەکدارانی داعش. 

 

ڕاگەیێنراوی فەرمی: فەرماندەیی ئۆپەراسیۆنە هاوبەشەکانی عێراق لە بەیاننامەیەکدا ڕایگەیاند: دوای چاودێریکردنێکی چوار ڕۆژە و دەستکەوتنی زانیاریی هەواڵگیری، ئەمڕۆ هەینی کاتژمێر 05:50ی ئێوارە، بە فڕۆکەی ئێف - 16 دیوەخانێکمان لە ناوچەی پەلکانەی سنووری سەڵاحەددین کردووەتە ئامانج کە چوار چەکداری داعشی تێدابوو.

 

زانیاریی زیاتر: بەپێی زانیارییە هەواڵگرییەکان، دیوەخانەکە چەک و کەلوپەلی لۆجیستی چەکدارانی داعشی تێدابووە و لە ئەنجامی بۆردوومانەکەدا لەناو براون.

 

ئەوەی پێویستە بیزانیت: لە 22ی ئەم مانگە، سەرۆکوەزیرانی عێراق کوژرانی "والی عێراق"ی سەر بە ڕێکخراوی تیرۆریستی داعش و هەشت لە سەرکردە باڵاکانی ئەو ڕێکخراوە ڕاگەیاند.