سوودانی: ئەرکی لەپێشینەمان ڕووبەڕووبوونەوەی گەندەڵییە

ئاڤا نیوز

 

سەرۆکوەزیرانی عێراق ڕایدەگەیێنێت، حکومەت درکی بە جددیەتی دۆسیەی بەرەنگاربوونەوەی گەندەڵی و کاریگەرییەکانی لەسەر کەرتەکانی دیکە کردووە، بۆیە ئەو دۆسیەیەی خستووەتە کارە لە پێشینەکانی.

 

وێنە گەورەکە: لەدوای ساڵی 2003 وە گەندەڵی لە عێراق بووەتە باوترین دیاردە و سەرجەم دامەزراوەکانی دەوڵەتی گرتووەتەوە، حکومەتی عێراق دەڵێت ئەو دۆسیەیەی خستووەتە کاری لەپێشینەی خۆی، بەڵام ئێستا گەیشتووەتە ئاستێكی مەترسیدار و ناتوانێت بە ئاسانی بنبڕی بکات.

 

چیرۆکی سەرەکی: محەممەد شیاع سوودانی، سەرۆکوەزیرانی عێراق پێشوازی لە سەرۆکی لیژنەی دەستپاکی لە پەرلەمان، سەرۆکی دیوانی چاودێری دارایی، سەرۆکی دەستەی دەستپاکی، جێگری سەرۆکی دادگای تێهەڵچوونەوەی کەرخ و جێگری سەرۆکی دادگای تێهەڵچوونەوەی ڕەسافە کرد.

 

ڕاگەیێنراوی فەرمی: سوودانی جەختی لەسەر گرنگی هەماهەنگییەکی پتەو لە نێوان دەسەڵاتەکانی جێبەجێکردن، یاسادانان و دادوەری کردووەتەوە بۆ پێشخستنی دۆسیەی دژەگەندەڵی.

 

سوودانی ئەوەشی ڕاگەیاندووە، حکومەت دۆسیەی بەرەنگاربوونەوەی گەندەڵی خستووەتە کارە لەپێشینەکانی خۆی و زوو درکی بە جددیەتی ئەم دۆسیەیە و کاریگەرییەکانی لەسەر کەرتەکانی دیکە کردووە، بۆیە بەردەوامە لە کەمکردنەوەی گەندەڵی و پاڵپشتیکردنی دەزگاکانی چاودێری و پاڵپشتیکردنیان.