کۆمپانیای کار سێ گرێبەست بۆ پەرەپێدانی کێڵگەکانی عێراق بەدەستدەهێنێت

ئاڤا نیوز

 

وەزارەتی نەوتی عێراق گەڕی مۆڵەتپێدانی پێنجەم و شەشەمی بۆ پەرەپێدانی کێڵگەکانی نەوت و غاز لەبەغدا و پارێزگاکانی دیکە ڕاگەیاند، کۆمپانیای کاریش لە هەرێمی کوردستان سێ گرێبەستی پەرەپێدانی لە چوار کێڵگەی نەوت و غازییدا بەدەستهێنا.

 

ئەوەی پێویستە بیزانیت: 29 کێڵگەی نەوتی عێراق ئەمساڵ لە گەڕی مۆڵەتپێدانی پێنجەم و شەشەم خراونەتەڕوو بۆ ئەوەی وەبەرهێنانیان تێدا بکرێت، پێشتر 14 کێڵگە گرێبەستیان بۆ کرا و ئێستا کاریان تێدا دەکرێت، لەماوەی ڕابردووشدا بەمەبەستی بەرهەمهێنان لە 10 کێڵگەی غاز و بانگهێشتکردنی کۆمپانیاکان تا بێن و وەبەرهێنان لەو کێڵگانەدا بکەن، بۆ ئەو مەبەستەش پێشتر وەزیری نەوتی عێراق سەردانی ئەمریکای کردبوو.

 

ڕاگەیێنراوی فەرمی: وەزارەتی نەوتی عێراق بڵاویکردەوە، لە چوارچێوەی تەواوکاری گەڕی پێنجەم و شەشەمی مۆڵەتپێدان بە کۆمپانیاکان بەمەبەستی کارکردن لە بەرهەمهێنان و پەرەپێدانی کێڵگەکانی نەوت و غاز لە بەغدا و پارێزگاکانی دیکەی عێراق، ئەمڕۆ 14 گرێبەست لەگەڵ حەوت کۆمپانیای ناوخۆیی و نێودەوڵەتیی ئەنجامدران.

 

بەگوێرەی ڕاگەیەنراوەکە کۆمپانیاکانی چین پشکی شێری گرێبەستەکانیان بەرکەوتووە، کۆمپانیای کاریش لە هەرێمی کوردستان براوەی سێ لە گرێبەستەکان بووە، لە چوار کێڵگەی نەوت و غازی پارێزگاکانی میسان، نەینەوا و کێڵگەیەکی هاوبەش لەنێوان پارێزگاکانی نەینەوا و ئەنبار لەسەر سنووری عێراق و سووریا سێ گرێبەستی بەدەستهێناوە.

 

وەزارەتی نەوتی عێراق دەڵێت، گرێبەستەکان توانای عێراق بۆ بەرهەمێنانی نەوت و غاز زیاد دەکەن و دەرفەتی گەورەی کارکردنیش بۆ دەرچووانی زانکۆ و پەیمانگاکان دەڕەخسێنن.