دوو ساڵ بەسەر دەستبەکاربوونی حکومەتەکەی سوودانیدا تێدەپەڕێت

ئاڤا نیوز

 

دوو ساڵ بەسەر دەستبەکاربوونی حکومەتەکەی سوودانیدا تێپەڕی، ڕاوێژکارێکی سەرۆکوەزیرانیش دەڵێت، سەرەڕای فشار و ئاستەنگییەکان، بەڵام حکومەت لە پاراستنی ئارامی وڵات و خزمەتگوزارییەکان سەرکەوتووبووە.

 

وێنە گەورەکە: 27ی تشرینی یەکەمی ساڵی 2022، حکومەتەکەی محەممەد شیاع سوودانی متمانەی پەرلەمانی بەدەستهێنا و ناوبراو دوای ساڵی 2003 بووە حەوتەم سەرۆکوەزیرانی عێراق.

 

لێدوانی فەرمی: حسێن عەلاویی، ڕاوێژکاری سەرۆکوەزیرانی عێراق ئەوەی خستووەتەڕوو، لەماوەی ئەو دوو ساڵەدا عێراق ژمارەیەک دەستپێشخەری گرنگی هەبووە، لەوانەش پڕۆژەی ڕێگای گەشەپێدان، پەرەپێدانی بەندەری فاو، بەهێزکردنی ژێرخانی ئاسایشی وزە و بازرگانی و کارەبا و ئینتەرنێت، هاوکات پەیوەندییەکانی عێراق و وڵاتانی هەرێمیش گەشەی بەرچاوی بەخۆیەوە بینیووە.

 

بەوتەی حسێن عەلاویی، کارنامەی حکومەتەکەی سوودانی بەئاراستەی تێکەڵبوونی عێراق بووە لەگەڵ ئابووری نێودەوڵەتی، بەو هۆیەش ئابوورییەکەی لەگەشەی بەردەوامدایە. جەختیش دەکاتەوە عێراق توانای ئەوەی هەیە لەبوارەکانی وزە و بازرگانی و گواستنەوەی نێودەوڵەتیدا ببێتە وڵاتێکی کاریگەری ناوچەکە.