بەهۆی بەکارهێنانی خاکی عێراق مقاوەمەی ئیسلامی هەڕەشە لە ئەمریکا دەکات

ئاڤا نیوز

مقاوەمەی ئیسلامی بەهۆی بەکارهێنانی ئاسمانی عێراق لەلایەن ئیسرائیلەوە بۆ لێدان لە دامەزراوەکانی ئێران، هەڕەشە لە هێزەکانی ئەمریکا دەکات و ئاماژە بۆ ئەوە دەکات کە دەبێت باجی ئەو کارەیان بدەن.

 

وێنە گەورەکە: بەرەبەیانی ڕۆژی شەممە 26-10-2024 وەک وەڵامێک بۆ هێرشە مووشەکییەکەی تاران بۆ سەر تەلئەڤیڤ لە سەرەتای مانگی ئۆکتۆبەر، ئیسرائیل هێرشی کردە سەر دامەزراوە سەربازییەکانی ئێران.

 

ڕاگەیێنراوی فەرمی: مقاوەمەی ئیسلامی وەک بەشێک لە کەتیبەکانی حیزبوڵڵا لە ڕاگەیێنراوێکدا ئاماژە بۆ ئەوە دەکات: "بەکارهێنانی ئاسمانی عێراق بۆ لێدان لە دامەزراوەکانی ئێران پێشینەیەکی مەترسیدار بوو کە پێشتر ئێران بەخۆیەوە نەیبینیوە، سەرەڕای بوونی زانیاریی کە ئاماژە بۆ ئەوە دەکات خاکی ئوردن و بیابانی حیجاز وەک ڕاڕەوێک بۆ فڕۆکەکانیان بەکار دەهێنن و ئەمەش بەبێ بوونی ڕێککەوتن و پلانی پێشوەختە لەگەڵ ئەمەریکییەکان کە بەسەر ئاسمانی عێراقدا زاڵ بوون، ڕووی نەدەدا".‏

 

کاریگەریی و لێکەوتەکان: بەپێی ڕاگەیێنراوەکەی مقاوەمە: "دەستدرێژی کردنە سەر کۆماری ئیسلامی لە لایەن قەوارەیەکی بەدکار و بێگانە لە ناوچەکە سەرپێچییەکی مەترسیدارە و‏ بۆ ئەمەش دەبێت ئەمریکا باجی کەمتەرخەمی خۆی بدات لە بەکارهێنانی ئاسمانی عێراق، ئەمەش بە یارمەتی خوای گەورە لە کات و شوێنی خۆیدا دەبێت".

 

لەلایەکی دیکە: کەریم علێوی، سەرۆکی لیژنەی ئاسایش و بەرگریی ئەنجوومەنی نوێنەرانی عێراق بە ئاڤا نیوزی ڕاگەیاند: دەرفەت بە ئیسرائیل دراوە بۆ ئەوەی ئاسمانی عێراق بەکار بهێنێت بۆ لێدان لە ئێران" و گوتیشی: " ئەگەر ئەمریکا ڕێز لەو ڕێککەوتنانە نەگرێت، ئەوا گرووپە چەکدارەکان مافی خۆیانە لەنێو خاکی عێراق هێرش بکەنە سەر  ئەمریکا".