سێ ئامێری پزیشکی گرنگ بۆ نەخۆشخانەی هیوا و سەنتەری ژیانەوە دابین دەکرێن

ئاڤا نیوز

سێ ئامێری پزیشکی گرنگ لەلایەن هێزەکانی ئیتاڵیاوە بۆ نەخۆشخانەی هیوا و سەنتەری ژیانەوەی تایبەت بە نەخۆشی شێرپەنجە دابین دەکرێن، پارێزگاری سلێمانیش دەڵێت 'ئەم ئامێرانە بۆ دیاریکردنی نەخۆشی شێرپەنجە و چارەسەرکردنیان بەکاردێن'.

 

بۆچی گرنگە: ئەم ئامێرانە ئاسانکاریی زۆر بۆ چارەسەری تووشبوانی شێرپەنجە دەکەن، بەشێک لەو نەخۆشانەی پێشتر ناچاربوون بۆ وەرگرتنی چارەسەر ڕوو لە دەرەوەی وڵات بکەن، ئێستا دەتوانن لە ناوخۆ چارەسەری پێویست وەربگرن.

 

لێدوانی فەرمی: هەڤاڵ ئەبوبەکر، پارێزگاری سلێمانی بە ئاڤا نیوزی ڕایگەیاند: لەلایەن تیمی هاریکاری سەربازی مەدەنی ئیتالیا ئامێرێکی دیاریکردنی شێرپەنجەی مۆخ دابین کراوە، دوو ئامێری پێشکەوتووی دیکەش لەلایەن کەرتی تایبەتی نیشتمانییەوە کە لە سەرمایەدارانی ناوخۆ پێکهاتوون دابینکراوە.

 

لەلایەکی دیکەوە: د.زەردەشت وتەبێژی نەخۆشخانەی هیوا، بە ئاڤا نیوزی ڕاگەیاند: ئامێرێک بە ناوی ' Brachytherapy ' بۆ سەنتەری ژیانەوە دابینکراوە، کە بۆ چارەسەری شێرپەنجەی ڕەحم بەکاردەهێنرێت، ئامێری دووەم ناوی ' FISH' بۆ دەستنیشانکردنی شێرپەنجەی خوێن بەکاردێت، ئامێری سێیەم ناوی 'Dexa bone scan'  بۆ دەستنیشانکردنی چڕی ئێسک بەکاردێت.

 

زنیاریی زیاتر: هەر یەک لە ئامێرەکانی ' FISH' و ' Dexa bone scan' بۆ یەکەمجارە لەسەر ئاستی عێراق و هەرێمی کوردستان بۆ چارەسەر بەکاردەهێنرێن، ئێستا لە نەخۆشخانەی هیوا و سەنتەری ژیانەوە کاریان پێ دەکرێت.

 

ئەوەی پێویستە بیزانیت: دابینکردنی سێ ئامێرەکە لەسەر پێشنیازیی نەخۆشخانەی هیوا و بەڕێوەبەرایەتیی گشتیی تەندروستی سلێمانی و پارێزگا بووە.

 

باکگراوند: نەخۆشخانەی هیوا و سەنتەری ژیانەوە لە پارێزگای سلێمانین و ڕۆژانە سەدان نەخۆش بۆ چارەسەری شێرپەنجە ڕوویان لێ دەکەن.