سزای لە سێدارەن بۆ حەوت بازرگانی ماددەی هۆشبەر دەردەکرێت

ئاڤا نیوز

دادگای ناوەندی تاوانەکان لە بەغدا سزای لە سێدارەدان بۆ حەوت کەس بە تاوانی بازرگانیکردن بە ماددە هۆشبەرەکان دەردەکات.

وێنە گەورەکە: لە دوایین ڕاپۆرتی خۆیدا،  نەتەوەیەکگرتووەکان هۆشداریی داوە لەوەی عێراق خەریکە دەبێتە ناوەندێکی گەورەی ماددەی هۆشبەر لەسەر ئاستی وڵاتانی ڕۆژهەڵاتی ناوەڕاست، بەجۆرێک دەبێتە خاڵی ترانزێتی ئەو ماددە هۆشبەرەی کە لە ئەفغانستان و ئێرانەوە بەرەو ئەوروپا و وڵاتانی دیکەی جیهان دەنێردرێت.

ڕاگەیێنراوی فەرمی: ناوەندی ڕاگەیاندنی ئەنجوومەنی دادوەری ڕایگەیاند: "ئەو تاوانبارانەی سزای لە سێدارەدانیان بۆ دەرکراوە، بڕی 136 کیلۆ ماددەی هۆشبەر لە جۆری کەبتاگۆن و دوو هەزار حەبی هۆشبەریشیان بەدەستەوە گیراوە".

زانیاریی زیاتر: سزارداوەکان بەپێی بڕگەکانی ماددەی 27ی یاسای ماددە هۆشبەرەکان و کارتێکەرە دەروونییەکان ژمارە 50ی ساڵی 2017 و بەپێی ماددەکانی 47 و 48 و 49ی یاسای سزادانی عێراق ئەو سزایەیان بۆ دەرکراوە.

ئەوەی پێویستە بیزانیت: بە گوتەی میقداد میری، گوتەبێژی وەزارەتی ناوخۆی عێراق ڕێژەی دەستبەسەرداگرتنی ماددەی هۆشبەر لەمساڵدا لە سەرتاسەری عێراق 210% بەرزبووەتەوە، لە دوو ساڵی ڕابردووشدا 569 تۆڕی جیاواز دەستگیرکراون.