ئاڤا مەرج و داواکارییەکانی پارتی و یەکێتی بۆ پێکهێنانی حکومەت ئاشکرا دەکات

ئاڤا نیوز

پارتی چوار مەرجی بۆ یەکێتی و هەر لایەنێک هەیە بەشداری لە کابینەی نوێی حکومەت بکات: یەک حکومەت، یەک قەوارە، یەک هێزی پێشمەرگە و دەرکردنی دەستوور، بەڵام یەکێتی جیاواز بیردەکاتەوە و داواکاری هەیە، بەجۆرێک وەرگرتنی ئیمتیازاتی دارایی و پۆستەکانی بەلاوە گرنگە.

وێنە گەورەکە: دوای ڕاگەیاندنی ئەنجامی کۆتایی هەڵبژاردن و یەکلابوونەوەی  دەنگ و کورسی لایەنەکان، لەمەودوا پێکهێنانی کابینەی نوێی حکومەت دەبێتە ڕۆژەڤی کوردستان و لە ئێستاوە دوو حیزبە گەورەکەی کوردستان، پارتی و یەکێتی وەرەقەی دانوستان ئامادە دەکەن، مەرج و داواکارییەکان دەنووسنەوە و ڕاشکاوانە لەسەر مێزی گفتوگۆ قسەی لەسەر دەکەن.

چیرۆکی سەرەکی: جارێ زووە قسە لەسەر ئەوە بکرێت گفتوگۆکان چەند دەخایەنن و کەی حکومەت پێکدەهێنرێت، بەڵکو هەنگاوی یەکەم گرنگە کە مەرجەکانی پارتی و داواکارییەکانی یەکێتین بۆ پێکهێنانی کابینەی نوێ.

زانیاریی تایبەت: ئاڤا زانیویەتی پارتی لە وێنە گەورەکەوە لە پێکهێنانی حکومەت دەڕوانێت، چوار مەرجی بۆ یەکێتی و هەر لایەنێک ئەوەیە بێتە ناو حکومەت: 

یەکەم: یەک حکومەتی یەکگرتوو و سەرتاسەری هەبێت لە زاخۆوە تاوەکو کەلار و کفری، بڕیارەکانی بێ کێشە و گرفت جێبەجێ بکرێن نەوەک لە هەندێک شوێن ڕێگری لێ بکرێت.

دووەم: یەک هێزی پێشمەرگە هەبێت، ببێتە هێزێکی نیشتمانی و لە ململانێی حیزبی دابماڵرێت.

سێیەم: یەک قەوارە، مەبەستی پارتی ئەوەیە سەرجەم حیزب و لایەنەکان کار بۆ پاراستنی قەوارەی هەرێمی کوردستان بکەن، لە پرسە نیشتمانییەکان یەک دەنگ و یەک هەڵوێست بن و هەموویان پێکەوە خزمەت بە بەرژوەندییە باڵاکانی گەلی کوردستان بکەن.

چوارەم: لە خولی نوێی پەرلەمان کار بۆ هەموارکردنی ڕەشنووسی دەستوور و تێپەڕاندنی بکرێت و هەرێمی کوردستان ببێتە خاوەن دەستووری خۆی.

لەلایەکی دیکەوە: هەر ئەمرۆ سەرۆکوەزیران مەسروور بارزانی، لەبارەی پێکهێنانی حکومەت یەکەم پەیامی بۆ ئەو لایەنە سیاسییانە نارد کە دەیانەوێت بەشداری لە حکومەت بکەن و گوتی: "هەر کەسێک بیەوێت بەشداربێت، دەبێت وەڵامدەرەوەی ویست و خواستی خەڵک بێت".

بۆچوونی بەرامبەر: یەکێتی لە گۆشەیەکی دیکەوە لە پێکهێنانی حکومەت دەڕوانێت و جیاواز لە پارتی بیردەکاتەوە، بەجۆرێک وەرگرتنی ئیمتیازاتی دارایی و سەربازی و  پۆستەکانی بەلاوە گرنگە، ئاڤا زانیویەتی یەکێتی ئەوەندی بتوانێت پێداگری لەسەر وەرگرتنی پۆستە باڵاکان دەکات بەتایبەت لە هەرسێ سەرۆکایەتییەکە، سەرۆکایەتیی هەرێم، سەرۆکایەتیی حکومەت، سەرۆکایەتیی پەرلەمان لەگەڵ ئەنجوومەنی باڵای دادوەری.