جیهان چاوەڕێی هەڵبژاردنی سەرۆکی نوێی ئەمریکایە

ئاڤا نیوز

لە سەرانسەری جیهان چاوەکان لەسەر ڕۆژی 5-11ی ئەمساڵن، خەڵکی ئەمریکا دەچنە سەر سندووقەکانی دەنگدان بۆ دیاریکردنی سەرۆکێکی نوێ بۆ وڵاتەکەیان. ئەو دەنگدانە بێجگە لە دیاریکردنی سەرۆک ئەرکی دیاریکردنی ئەندامانی کۆنگرەشی لەئەستۆیە.

 

وێنە گەورەکە: دوو حیزبی سەرەکی بە دوو نوێنەری خۆیانەوە بەشدارن بۆ ئەم دەنگدانە، دۆناڵد ترەمپ سەرۆککۆماری پێشووتر کاندیدی کۆمارییەکانە و کامالا هاریس، جێگری سەرۆکی ئێستای ئەمریکا کاندیدی دیموکراتەکانە.

ئەوەی پێویستە بیزانیت: بەشێک لە سیاسی و سەرمایەدار و هونەرمەندان لەنێویاندا ئیلۆن مەسک پشتیوانی دۆناڵد ترەمپ دەکات، بەشێکی دیکەش وەک نانسی پیلۆسی و باراک ئۆباما پشتیوانی کامالا هاریس دەکەن. 

لێدوانی فەرمی: دیموکراتەکان حیزبێکی لیبرالن و زیاتر کار بۆ مافی مرۆڤ و ئاسایشی کۆمەڵایەتی و گۆڕانی کەشوهەوا دەکەن، باراک ئۆباما، سەرۆکی پێشووتری ئەمریکا دەڵێت: "هیج بەڵگەیەک بەردەست نییە کە دۆناڵد ترەمپ بێجگە لە خۆی بیر لە هیچ کەسێکی دیکە بکاتەوە". 

 لەلایەکی دیکەوە: کۆمارییەکان بە حیزبی بەتەمەنی گەورە یان پارێزەران دەناسرێنەوە کە ئەجێندای کاریان لەسەر کەمکردنەوەی باج، بەهێزکردنی کەرتی تایبەت و ڕێگریکردنە لە هاتنەژوورەوەی کۆچبەران بۆ ناو ئەمریکا.

بۆچوونی بەرامبەر: ئیلۆن مەسک، خاوەنی کۆمپانیای تێسلا و سەرمایەداری ئەمریکا دەڵێت: "بەڵێ بەڕاستی ئێمە دەمانەوێت سنوورەکانمان پارێزراو بن، دەمانەوێت شارەکانمان پارێزراو بن، خەرجکردنێکی ئاساییمان دەوێت، نامانەوێت هەڵاوسانێکی زۆرمان هەبێت، دەمانەوێت بەشێوەیەکی ئازاد ڕای خۆمان دەرببڕین و دەمانەوێت ڕێز لە دەستووی ئەمریکا بگیرێت".