لە هەڵەبجە 30 هەزار تۆن هەنار بۆ فرۆشتن نمایش دەکرێت

ئاڤا نیوز

 

سبەی 10مین فێستیڤاڵی هەنار و پاییزی هەڵەبجە ڕێکدەخرێت، بڕیارە 30 هەزار تۆن هەنار نمایش بکرێن و پێشبینی دەکرێت 200 هەزار کەس ئامادەبن.

وێنە گەورەکە: هەڵەبجە خاوەن چەندین جۆر هەناری تایبەتە و لەسەر ئاستی کوردستان بەناوبانگە، ساڵانە دەیان هەزار تۆن بەرهەمی هەیە و بەم بۆنەیە فێستیڤاڵ ساز دەکات. ناوبانگی هەناری هەڵەبجە سنووری عێراقی بڕیوە و ساڵانە هەناردەی چەندین وڵات دەکرێت.

لێدوانی فەرمی: ئازاد تۆفیق، پارێزگاری هەڵەبجە بە ئاڤا نیوزی گوت: "لەڕووی لۆجستی و ئیداری و ئەمنی و تەندروستییەوە هەموو ئامادەکارییەک کراوە و پێشبینی دەکەین زیاتر لە 200 هەزار گەشتیار سەردانی شارەکە بکەن".

زانیاریی زیاتر: فێستیڤاڵی هەنار و پاییزی هەڵەبجە لە پارکی گشتی شارەکە دەکرێت و 600 کەپر و شوێن ئامادەکراون، 31-10-2024 دەستپێدەکات و بە چەندین چالاکی جۆراوجۆر سێ ڕۆژ بەردەوام دەبێت.

 

ژمارەکان وادەڵێن: 10 هەزار دۆنم زەوی باخی هەنار لە سنووری پارێزگای هەڵەبجە هەیە، بەگوێرەی ڕووپێوییەکانی بەڕێوەبەرایەتیی کشتوکاڵی شارەکە ئەمساڵ 25 بۆ 30 هەزار تۆن بەرهەمیان هەیە.

ئەمەش بزانە: سەرەڕای بەرهەمی وشککراو، هەموو ئەو بەرهەمە کشتوکاڵیانەی لەم وەرزەدا بەرهەمهاتوون لەگەڵ چەند بەرهەمێکی دیکەی وەک 'زەیتی زەیتوون، سابوون، خۆشکردنی ترشەمەنییەکان، سرکە'، کە بەرهەمی کارگەکانی سنوورەکەن، نمایش دەکرێن.