بافڵ تاڵەبانی هێرش دەکاتە سەر نەوشیروان مستەفا و گۆڕانیش وەڵامی دەداتەوە

ئاڤا نیوز

 

بافڵ تاڵەبانی سەرۆکی یەکێتیی لە دیداری مێری هێرشی کردە سەر ڕێکخەری گشتیی پێشووتری بزووتنەوەی گۆڕان و بە تێکدانی هاوسەنگی هێز لە هەرێمی کوردستان تۆمەتباری کرد. لەبەرامبەردا گۆڕان بەتووندی وەڵامی قسەکانی سەرۆکی یەکێتی دایەوە.

وێنە گەورەکە: بافڵ تاڵەبانی، سەرۆکی یەکێتیی نیشتمانیی کوردستان لەمیانی بەشداریکردن لە دیداری مێری لە هەولێر بەشداری پانێڵیکی کرد، ناوبراو لەپانێڵەکەدا هێرشی کردە سەر نەوشیروان مستەفا، ڕێکخەری کۆچکردووی بزووتنەوەی گۆڕان و تۆمەتباری کرد بەوەی هاوسەنگی هێزی لە هەرێمی کوردستان تێکدا. لەبەرامبەر ئەو قسانەی سەرۆکی یەکێتی، بزووتنەوەی گۆڕان (باڵی کورانی نەوشیروان مستەفا) ڕایانگەیاند، "دەتوانین تەواوی مێژووی یەکێتیی بخەینە ژێر پرسیارەوە".

 

لێدوانی فەرمی: بافڵ تاڵەبانی، سەرۆکی یەکێتی لە دیداری مێری ڕیگەیاند، " نەوشیروان مستەفا هاوسەنگی هێزی تێکدا، پرۆسەیەکی دەستپێکرد کە نەیتوانی تەواوی بکات، دەیشیزانی پێی تەواو ناکرێت، ئەمە زۆر ئازاری کوردستانی دا، گۆڕان هاتە ناو حکومەت و دواتر نەمان."

 

بۆچوونی لایەنی بەرامبەر: نزار مەحموود، گوتەبێژی بزووتنەوەی گۆڕان( باڵی کوڕانی نەوشیروان مستەفا)  لەرێگەی ئاڤاوە وەڵامی قسەکانی سەرۆکی یەکێتی دایەوە  و ڕایگەیاند، "جیابوونەوەی کاک نەوشیروان بۆ ئەوەبوو هاوسەنگی هێز لە کوردستان تێکچووبوو، دروست بوونی گۆڕانیش بۆ گەڕاندنەوەی ئەو هاوسەنگییە  بوو لە هەرێمی کوردستان".

 

ئەوەی پێویستە بیزانیت: گوتەبێژەکەی بزووتنەوەی گۆڕان ئەوەشی گوت " مێژووی گۆڕان بە کەس ناکەوێتە ژێر پرسیارەوە، ئەگەر ئەوان مێژووی ئێمە بخەنە ژێرپرسیارەوە، ئێمەش دەتوانین مێژووی یەکێتیی بخەینە ژێرپرسیارەوە."