ئاسایشی هەرێمی کوردستان لە بەغدا 100 کیلۆ ماددەی هۆشبەر ئاشكرا دەکات

ئاڤا نیوز

 

بەڕێوەبەرایەتیی نەهێشتنی ماددە هۆشبەرەکانی سەر بە بەڕێوەبەرایەتیی گشتیی ئاسایشی هەرێمی کوردستان شکست بە هەوڵێکی بە قاچاخبردنی ماددەی هۆشبەر لە شاری بەغدا دەهێنێت.

 

وێنە گەورەکە: بە هاوکاری بەڕێوەبەرایەتیی نەهێشتنی ماددە هۆشبەرەکانی سەر بە بەڕێوەبەرایەتیی گشتیی ئاسایشی هەرێمی کوردستان، شکست بە هەوڵێکی بە قاچاخبردنی 100 کیلۆ ماددەی هۆشبەر لە جۆری کاپتاگۆن لە شاری بەغدا دەهێنێت.

 

ڕاگەێنراوی فەرمی: حوسێن یوسف تەمیمی، بەڕێوەبەری بەشی ڕاگەیاندن لە بەڕێوەبەرایەتیی گشتیی کاروباری ماددە هۆشبەرەکان لە وەزارەتی ناوخۆی عێراق ڕایگەیاند: ئۆپەراسیۆنەکە لە چوارچێوەی هەڵمەتە نیشتمانییەکان دێت بۆ بەرەنگاربوونەوەی ماددە هۆشبەرەکان لە ڕێگەی هاوکاری ئەمنی لە نێوان حکومەتی فیدراڵ و حکومەتی هەرێمی کوردستان.

 

لەلایەکی دیکەوە: سەرچاوەیەک لە بەڕێوەبەرایەتیی ماددە هۆشبەرەکانی هەرێمی کوردستان بە ئاڤا نیوزی ڕاگەیاند: ئەو بارە لە سووریاوە گەیێنرابووە بەغدا بۆ ئەوەی لەوێشەوە بۆ هەولێر و دواتر بۆ ئێران و دواجار بۆ یەمەن و سعوودیە هەناردە بکرێت، بەڵام بەهاوکاری ئێمە توانرا ئەو کەسە لەلایەن هێزە ئەمنییەکانی عێراق لە شاری بەغدا دەستگیر بکرێت و دەست بەسەر ماددە هۆشبەرەکانیشدا بگیرێت.

 

ئەوەی پێویستە بیزانیت: گەورەترین کارگەی بەرهەمهێنانی حەبی کاپتاگۆن لە وڵاتی سووریا و لوبنانە، حکومەتی سووریا بە ناڕاستەوخۆ بازرگانی بەو ماددەیەوە دەکات.

 

ئەمەش بزانە: نەتەوەیەکگرتووەکان لەوبارەیەوە هۆشداریی داوە، کە عێراق خەریکە دەبێتە ناوەندێکی گەورەی ماددەی هۆشبەر لە ڕۆژهەڵاتی ناوەڕاست، بەجۆرێک دەبێتە خاڵی ترانزێتی ئەو ماددە هۆشبەرەی کە لە ئەفغانستان و ئێرانەوە بەرەو ئەوروپا و وڵاتانی دیکەی جیهان دەنێردرێت.