لە دوو ساڵدا 15 هەزار ڕووداوی هاتووچۆ لە عێراق تۆمارکراون

ئاڤا نیوز

 

تەنیا لە ماوەی ئەمساڵ و ساڵی ڕابردوو 15 هەزار ڕووداوی هاتووچۆ لە شارەکانی عێراق ڕوویانداوە، زیاتر لە 79٪ی ڕووداوەکانیش هۆکارەکەی بۆ شۆفێر دەگەڕێتەوە.

 

ڕاگەیێنراوی فەرمی: فازڵ غەراوی، سەرۆکی ناوەندی ستراتیجی بۆ مافەکانی مرۆڤ ڕایگەیاند: لە ساڵی 2023دا 12 هەزار ڕووداوی هاتووچۆ تۆمارکراون، تاوەکو نیوەی یەکەمی ئەمساڵیش سێ هەزار حاڵەتی دیکە تۆمار کراوە.

 

ژمارەکان وادەڵێن: لە کۆی ئەو 15 هەزار ڕووداوەی لە ماوەی ئەم دوو ساڵە تۆمارکراون، ڕووداوەکانی پێکدادان زۆرترین ڕێژەی تۆمار کردووە.

- ڕووداوی پێکدادانی ئۆتۆمبێلەکان بەڕێژەی 56.3%.
- ڕووداوی شێلان بە ڕێژەی 32.3%.
- ڕووداوی وەرگەڕان بە ڕێژەی 9.5%.
- ڕووداوەکانی دیکە بە ڕێژەی 1.8%.

 

کاریگەریی و لێکەوتەکان: بەپێی ئامارەکانی بەڕێوەبەرایەتی گشتی هاتووچۆ و پزیشکی داد و وەزارەتی پلاندانان، بەهۆی ڕووداوەکانی ساڵی 2023، سێ هەزار و 19 کەس گیانیان لەدەستداوە و 12 هەزار و 314 کەسی دیکەش بریندار بوونە. تاوەکو نیوەی یەکەمی ئەمساڵیش هەزار کەس بەهۆی ڕووداوەکانی هاتووچۆوە گیانیان لەدەستداوە و چوار هەزار 360 کەسیش برینداربوونە.

 

هۆکارە زانراوەکان: بە گوتەی غەراوی، 79.2%ی هۆکاری پشت ڕووداوەکانی هاتووچۆ شۆفێرانن، 8.1%ی بۆ ئۆتۆمبێل بووە، 6.2%ی هۆکاری خراپیی ڕێگا بووە و 6.5%ی هۆکاری دیکەی لە پشتەوە بووە.

 

زانیاریی زیاتر: غەراوی هۆکارەکانی بەرزبوونەوەی ڕێژەی ڕووداوەکانی هاتووچۆ دەگەڕێنێتەوە بۆ "کۆنی ڕێگاکان و نۆژەننەکردنەوەیان، نەبوونی هێماکانی هاتووچۆ، نەبوونی پەرژینی سەلامەتی لەسەر ڕێگاکان، نەبوونی کامێرای تۆمارکردنی خێرایی، پابەندنەبوونی شۆفێران بە یاساکانی هاتووچۆ، خێرایی و دەرچوون لە لای ڕاست، بەکارهێنانی مۆبایل، نەبەستنی پشتێنی سەلامەتی و پابەندنەبوون بە هێماکانی هاتووچۆ، نەبوونی مەرجی تووندوتۆڵی لە بەشێکی زۆری ئۆتۆمبێلەکان".

 

چارەسەرەکان: بۆ کەمکردنەوەی ڕووداوەکانی هاتووچۆ غەراوی بە پێویستی دەزانێت "کامێرای تۆمارکردنی خێرایی لەسەرجەم ڕێگا نێودەوڵەتیی و نێوخۆییەکان دابنرێت و سزای پێبژاردنیش زۆر بکرێت بۆ ئەوانەی زێدەڕۆیی لە خێرایی دەکەن، دروستکردنی ڕێگای خێرا بە پێوەری جیهانی و هاوردەکردنی ئۆتۆمبێل لە سەرچاوە نێودەوڵەتییە بەناوبانگەکان و ئەنجامدانی پشکنینی وەرزی بۆ ئۆتۆمبێلەکان بۆ دڵنیابوون لەوەی کە مەرجەکانی سەلامەتییان تێدایە، هاوکات چاودێریکردنی ئەو ئۆتۆمبێلانەی کە لەلایەن منداڵانی خوار تەمەنی یاساییەوە یان بەبێ مۆڵەتی شۆفێری لێیدەخوڕن".